हुशार पुरुष चांगले पार्टनर असतात का? रिलेशनशीपमध्ये बुद्धिमत्तेची भूमिका काय आहे?

जेव्हा महिला त्यांच्या जोडीदाराची निवड करत असतात, तेव्हा सहसा प्रेम, निष्ठा, समजूतदारपणा आणि आर्थिक स्थैर्य या गोष्टींना प्राधान्य दिलं जातं. या सर्व गोष्टी नक्कीच महत्त्वाच्या आहेत, पण एक गोष्ट अनेकदा दुर्लक्षित केली जाते ती म्हणजे बुद्धिमत्ता.

नातेसंबंधांमध्ये हृदयाच्या भावना, आपुलकी आणि एकमेकांवरील प्रेम महत्त्वाचे असते, हे निर्विवाद आहे. मात्र, अलिकडील संशोधनातून असं स्पष्ट झालं आहे की नातं टिकवण्यासाठी आणि ते अधिक मजबूत व निरोगी ठेवण्यासाठी जोडीदाराची मानसिक समज, भावनांवर नियंत्रण आणि विचारांची स्पष्टता अत्यंत आवश्यक असते.

संशोधन काय सांगतं?

ओकलँड विद्यापीठ, अमेरिका येथे झालेल्या एका अभ्यासानुसार, ज्या पुरुषांमध्ये विचार करण्याची सखोल क्षमता, समजूतदारपणा, भावनांची जाणीव आणि संयम असतो, त्यांचे नातेसंबंध अधिक समाधानकारक आणि टिकाऊ असतात. या अभ्यासात हेही लक्षात आलं की हुशार पुरुष,

• समस्यांना शांतपणे आणि समजूतदारपणे सामोरे जातात,

• वाद टाळतात आणि मतभेदांच्या वेळी संयम बाळगतात,

• जोडीदाराच्या भावना समजून घेतात आणि त्यांना महत्त्व देतात,

• कठीण प्रसंगी घाईघाईने नाही तर शांतपणे निर्णय घेतात.

या संशोधनात बुद्धिमत्तेचा अर्थ फक्त शैक्षणिक पात्रता किंवा व्यावसायिक यश असा न ठेवता, भावनिक बुद्धिमत्ता (Emotional Intelligence), समजूतदार संवाद, आणि सहभावना या गुणांवर भर दिला आहे.

का ठरतो हुशार पुरुष एक चांगला जोडीदार?

संशोधनानुसार, हुशार पुरुष केवळ समस्या ओळखण्यासच नाही, तर त्या वाटाघाटीने सोडवण्यासाठी सक्षम असतात. ते

• आपल्या कृतींचा नातेसंबंधावर काय परिणाम होईल याचा विचार करतात,

• संवादातून समज वाढवतात,

• गरज पडल्यास आपली चूक मान्य करतात,

• जोडीदारावर दबाव न आणता, त्याला आधार देतात.

या सगळ्या गोष्टींमुळे नातेसंबंधांमध्ये विश्वास, स्थैर्य आणि सामंजस्य वाढतं.

महिलांनी काय लक्षात घ्यावं?

एखाद्या महिलेला जर दीर्घकाळ टिकणारं, समतोल आणि प्रेमळ नातं हवं असेल, तर केवळ जोडीदाराची आर्थिक स्थैर्यता, रुप, किंवा करिअर पाहून निर्णय घेणं पुरेसं नाही. त्याच्यातील,

• विचार करण्याची क्षमता,

• भावनांवरील नियंत्रण,

• समजूतदारपणा,

• आणि माणुसकीची भावना

या बाबींनाही तेवढंच महत्त्व दिलं पाहिजे.

आजच्या काळात, नातेसंबंध केवळ भावना किंवा आकर्षणावर नाही तर एकमेकांना समजून घेण्याच्या क्षमतेवर टिकतात. आणि ही क्षमता हुशार, समजूतदार आणि संयमी जोडीदारामध्ये अधिक आढळते. त्यामुळे, भविष्यासाठी योग्य जोडीदार निवडताना त्याची बुद्धिमत्ता आणि भावनिक समज यांच्याकडे दुर्लक्ष न करता, त्या गुणांनाही तितकंच महत्त्व द्यायला हवं.