चॅटजीपीटी तयार करणारी कंपनी ओपनएआय (OpenAI) एका नव्या प्रोडक्टवर काम करत असल्याची चर्चा आहे. हे प्रोडक्ट कोणतेही अॅप किंवा सॉफ्टवेअर नसून हार्डवेअर डिव्हाइस असणार असल्याचे सांगितले जात आहे. मिळालेल्या माहितीनुसार, कंपनी सध्या स्मार्ट पेन विकसित करत आहे.
ओपनएआय गेल्या काही काळापासून या हार्डवेअर प्रोजेक्टवर काम करत असून, या प्रोडक्टला कंपनीच्या आतल्या वर्तुळात “गमड्रॉप” (Gumdrop) असे कोडनेम देण्यात आले आहे. मात्र, या संदर्भात ओपनएआयकडून अजून कोणतीही अधिकृत माहिती जाहीर करण्यात आलेली नाही.
तरीसुद्धा, या संभाव्य स्मार्ट पेनबाबत तंत्रज्ञानप्रेमींमध्ये उत्सुकता आणि अपेक्षा वाढत चालल्या आहेत. ओपनएआय या नव्या प्रोडक्टमधून नेमके काय खास देणार, याकडे सगळ्यांचे लक्ष लागले आहे.
साधारण पेनसारखा दिसणाऱ्या या डिव्हाइसामध्ये थक्क करून सोडणारे फीचर्स मिळणार असल्याचे सांगितले जात आहे. रिपोर्ट्सनुसार, या स्मार्ट पेनने घेतलेले नोट्स लगेच डिजिटल टेक्स्टमध्ये रूपांतरित करता येतील.
यामध्ये ऑडिओ फीचर देखील असणार असून, तुम्ही बोललेले शब्द हे पेन डिजिटल स्वरूपात नोंदवू शकेल. याशिवाय, या डिव्हाइसला व्हॉइस असिस्टंटने सुसज्ज करण्याची तयारी सुरू आहे.
या स्मार्ट पेनची सर्वात खास बाब म्हणजे ते थेट चॅटजीपीटीशी कनेक्ट करता येणार आहे. त्यामुळे तुम्ही जे काही बोलाल किंवा लिहाल, ते चॅटजीपीटी वाचून आपोआप नोट्स तयार करू शकेल. एवढेच नाही तर त्या टेक्स्टचे सारांश (समराइज) तयार करणे आणि पुन्हा लिहिणे (रिराइट) देखील शक्य होईल.
विशेष म्हणजे, हे सगळे काम कोणत्याही मोबाइल किंवा लॅपटॉपशिवाय करता येणार असल्याने हे स्मार्ट पेन तंत्रज्ञानाच्या जगात मोठा बदल घडवू शकते.
