नववर्षाच्या पहिल्याच दिवशी, भारत संचार निगम लिमिटेडनं देशभरातील सर्व टेलिकॉम सर्कल्समध्ये व्हॉईस ओव्हर वाय-फाय (VoWiFi) कॉलिंग सेवा सुरू करण्याची घोषणा केली. ही प्रगत सेवा आता देशातील सर्व बीएसएनएल ग्राहकांना उपलब्ध झाली असून, कठीण परिस्थितीतही उच्च दर्जाची आणि अखंड कनेक्टिव्हिटी प्रदान करेल, असं भारताच्या प्रमुख सरकारी दूरसंचार कंपनी बीएसएनएलनं म्हटलं आहे. ग्राहकांना वाय-फाय नेटवर्कवरून उच्च दर्जाचे व्हॉईस कॉल्स आणि मेसेजेस करता येईल. विशेषतः ग्रामीण आणि दुर्गम भागात मोबाईल सिग्नल कमकुवत असलेल्या ठिकाणी ही सेवा अत्यंत उपयुक्त ठरेल.
मोफत व्हॉईस ओव्हर वाय-फाय सुविधा
सरकारी मालकीची दूरसंचार कंपनी बीएसएनएल आपल्या ग्राहकांच्या सोयीसाठी सतत नेटवर्कवर काम करत आहे. कंपनीने अलीकडेच देशव्यापी 4G नेटवर्क सुरू केले आहे आणि आता ती आणखी एक नवीन सेवा सुरू करत आहे. जर तुमच्या स्मार्टफोनमध्ये बीएसएनएल सिम असेल आणि तुम्हाला वीक नेटवर्क कनेक्टिव्हिटीची काळजी वाटत असेल, तर तुमची चिंता कमी होणार आहे. टेलिकॉम कंपनी बीएसएनएल तिच्या युजर्ससाठी एक सेवा सुरू करत आहे जी तुम्हाला नेटवर्क शिवाय देखील कॉल करण्याची परवानगी देईल.
बीएसएनएलच्या युजर्सला लवकरच कमकुवत नेटवर्कच्या समस्यांपासून मुक्तता मिळणार आहे. कंपनी VoWi-Fi (व्हॉइस ओव्हर वाय-फाय) सेवा सुरू करण्याची तयारी करत आहे. ही सेवा सुरू झाल्यानंतर, ग्राहक कमकुवत किंवा नेटवर्क नसतानाही कॉल करू शकतील. ईटी टेलिकॉममधील एका वृत्तानुसार, बीएसएनएलचे अध्यक्ष ए. रॉबर्ट जेरार्ड रवी यांनी सांगितले की, सध्या दोन झोनमध्ये VoWi-Fi प्रोजेक्ट राबविला जात आहे. खराब नेटवर्क कव्हरेज असलेल्या भागात ही सेवा खूप चांगली काम करत आहे.
BSNL ची सेवा कशी सक्रिय करायची ?
बहुतांश आधुनिक स्मार्टफोनमध्ये VoWiFi सपोर्ट आहे. ग्राहकांना फक्त हँडसेट सेटिंग्जमध्ये ‘वाय-फाय कॉलिंग’ पर्याय सक्रिय करावा लागेल. डिव्हाइस सुसंगतता किंवा मदतीसाठी जवळच्या बीएसएनएल ग्राहक सेवा केंद्राला भेट द्यावी किंवा हेल्पलाइन 18001503 वर संपर्क साधावा, असं मंत्रालयानं सांगितलं. ही सेवा बीएसएनएलच्या नेटवर्क आधुनिकीकरण कार्यक्रमाचा महत्त्वाचा भाग असून, विशेषतः दुर्गम आणि कमी सेवा असलेल्या भागातील कनेक्टिव्हिटी सुधारण्यासाठी बीएसएनएलची वचनबद्धता दर्शवते. या लाँचमुळं ग्रामीण भारतातील डिजिटल दरी कमी करण्यात मोठी मदत होईल आणि सरकारी दूरसंचार कंपनीला खासगी स्पर्धकांशी स्पर्धा करण्यास बळ मिळेल.
