इंजिनिअरिंग डिप्लोमा ही एक व्यावसायिक पदवी आहे जी विद्यार्थ्यांना तंत्रज्ञानाच्या विविध शाखांमध्ये कौशल्ये विकसित करण्यास मदत करते. ही पदवी घेतल्यानंतर अनेक उद्योगांमध्ये करिअरच्या संधी उपलब्ध होतात. विद्यार्थी या अभ्यासक्रमाला भविष्याच्या दृष्टीने महत्त्वाचे मानतात, कारण यात प्रात्यक्षिक शिक्षण, प्रयोगशाळा अनुभव आणि प्रोजेक्ट्सचा समावेश असतो. काही विद्यार्थी उच्च शिक्षणासाठी बीई किंवा बीटेक करतात, तर काही थेट नोकरीला लागतात. डिप्लोमा अभ्यासक्रम तुलनेत कमी कालावधीचा आणि खर्चिकदृष्ट्या परवडणारा असतो. त्यामुळे अनेक विद्यार्थ्यांचा कल डिप्लोमा अभ्यासक्रमाकडे वाढत आहे. तांत्रिक शिक्षणामुळे आत्मविश्वास वाढतो आणि विद्यार्थ्यांना स्वतःचे भविष्य घडवण्याची संधी मिळते. आता याच इंजिनिअरींग डिप्लोमा प्रथम वर्षांच्या प्रवेशासाठी मुदतवाढ देण्यात आल्याची माहिती आहे.
प्रवेशासाठी 26 जूनपर्यंत मुदतवाढ
तंत्रशिक्षण संचालनालय, महाराष्ट्र राज्याने 2025-26 या शैक्षणिक वर्षासाठी पोस्ट-एसएससी (दहावीनंतरच्या) अभियांत्रिकी पदविका अभ्यासक्रमांच्या प्रथम वर्ष प्रवेशासाठी अर्ज सादर करण्याची अंतिम मुदत 26 जून 2025 पर्यंत वाढवली आहे. विद्यार्थ्यांना गुणपत्रक, जातीचा दाखला, नॉन-क्रिमीलेअर प्रमाणपत्र, उत्पन्नाचा दाखला आदी आवश्यक कागदपत्रे मिळण्यात अडचणी येत असल्यामुळे आणि प्रवेश प्रक्रिया सुरळीत पार पडावी, या उद्देशाने ही मुदतवाढ करण्यात आली आहे. विद्यार्थ्यांनी ऑनलाइन नोंदणी, कागदपत्रे अपलोड करणे, त्यांची पडताळणी आणि अर्ज निश्चिती ही सर्व प्रक्रिया 26 जून 2025 पर्यंत पूर्ण करणे आवश्यक आहे. ही मुदतवाढ विद्यार्थ्यांना आवश्यक कागदपत्रे सादर करण्यासाठी आणि संपूर्ण अर्ज प्रक्रिया वेळेत पूर्ण करण्यासाठी उपयुक्त ठरणार आहे.
विद्यार्थ्यांसाठी उपयुक्त अभ्यासक्रम
कमी शुल्कात उपलब्ध असलेला व्यावसायिक अभ्यासक्रम असून तो थेट नोकरीच्या संधी उघडतो. हा अभ्यासक्रम पूर्ण केल्यानंतर विद्यार्थी कनिष्ठ अभियंता, तांत्रिक सहाय्यक, प्रयोगशाळा सहाय्यक, प्रॉडक्शन सुपरवायझर, ऑटोमोबाईल टेक्निशियन, सीएनसी ऑपरेटर, सीएडी डिझायनर यांसारख्या पदांवर सहज नोकरी मिळवू शकतात. विशेषतः ग्रामीण आणि निमशहरी भागातील विद्यार्थ्यांसाठी हा अभ्यासक्रम उत्पन्नाचे स्थिर व प्रभावी साधन ठरतो. विद्यार्थ्यांनी ही संधी निश्चितपणे साधावी, असे आवाहन शिक्षण संस्थांकडून करण्यात आले आहे. भविष्याची दारे लवकर उघडणारा हा अभ्यासक्रम असल्याने विद्यार्थ्यांची डिप्लोमाला पसंती मिळताना दिसत आहे. शिवाय प्रवेश प्रक्रियेला देखील चांगला प्रतिसाद मिळत असल्याने या प्रवेशासाठी मुदतवाढ देण्याचा निर्णय आता घेण्यात आल्याची माहिती समोर येत आहे.
