शेतकरी आणि सर्वसामान्य जनतेसाठी आनंदाची बातमी समोर आली आहे. मान्सून अखेर केरळमध्ये दाखल झाला असल्याची अधिकृत घोषणा भारतीय हवामान खात्याने केली आहे. यापूर्वी 2009 मध्ये मान्सून केरळात 23 मे रोजी दाखल झाला होता. त्यानंतर 15 वर्षांनी मान्सून इतक्या लवकर केरळात दाखल झाला आहे. विशेष म्हणजे मान्सून केरळात दाखल व्हायला आणखी एक आठवडा लागू शकतो, असं सांगितलं जात असताना मान्सून एक आठवडा आधीच दाखल झाला आहे. जूनच्या पहिल्या आठवड्यात मान्सूनचा पाऊस राज्यात एंट्री घेणार आहे.
महाराष्ट्रात मान्सूनचं आगमन कधी?
जूनच्या पहिल्या आठवड्यात मान्सूनचा पाऊस तळकोकणात दाखल होण्याचा अंदाज आहे. पुढील चार ते पाच दिवसांत मान्सून कोकणात दाखल होण्याची शक्यता असून कोकणात सध्या जोरदार मान्सूनपूर्व पाऊस सुरु आहे. मुंबईत 1 जूनपर्यंत मान्सून दाखल होण्याची शक्यता वर्तवण्यात येत आहे. केरळ हे मान्सूनचे भारतातील प्रवेशद्वार मानले जाते. केरळात प्रवेश केल्यानंतर नैऋत्य मोसमी वारे अर्थात मान्सून देशभरात आगेकूच करतो. त्यामुळे 1 ते 6 जूनच्या दरम्यान मान्सूनचा पाऊस महाराष्ट्राचा बराच भाग व्यापेल. पुढे त्यानंतर उत्तर भारताच्या दिशेने मान्सूनची आगेकूच सुरू होत असते.
यंदा पावसाचं प्रमाण किती?
पाऊस यंदा सरासरी ओलांडू शकतो, असा अंदाज आहे. हा पाऊस देशाच्या बहुतांश भागात सरासरी ओलांडेल, असा प्राथमिक अंदाज वर्तवला जात आहे.
Southwest Monsoon has set in over Kerala, today the 24 th May 2025:
Southwest Monsoon has set in over Kerala today, the 24th May, 2025, against the normal date of 1st June. Thus, southwest monsoon has set in over Kerala 8 days before the normal date. This is the earliest date… pic.twitter.com/n9TcdkG3Ym
— India Meteorological Department (@Indiametdept) May 24, 2025
राज्यात पावसाचं धुमशान सुरू
राज्यात सध्या पूर्वमोसमी पावसाने थैमान घातल्याचं चित्र आहे. पश्चिम महाराष्ट्र आणि कोकणात पावसाचा जोर अधिक आहे. रायगड, रत्नागिरी, सांगली, सातारा, पुणे आणि सोलापूर या जिल्ह्यांत येणाऱ्या 48 तासांत अति मुसळधार पाऊस कोसळेल, असा अंदाज आहे. या भागात आंबा, द्राक्षे आणि केळी बागायतदारांना यंदा पूर्व मोसमी पावसामुळे मोठा फटका बसला आहे. या तुफान पावसामुळे ठिकठिकाणी वीज पुरवठा खंडीत झाल्याचे चित्र आहे, शिवाय लोकांचे दैनंदिन जीवनाचे वेळापत्रक काहीसे कोलमडले आहे.
