भारतीय जनता पक्षाचे गोरखपुरचे खासदार आणि भोजपुरी चित्रपटांचे सुपरस्टार रवी किशन शुक्ला यांना फोनवरून जीवे मारण्याची धमकी मिळाली आहे. फोन करणाऱ्याने स्वतःची ओळख अजय कुमार यादव अशी करून दिली आहे, जो बिहारमधील आरा जिल्ह्यातील रहिवासी आहे. प्रकरणाचे गांभीर्य लक्षात घेऊन, खासदाराच्या स्वीय सचिवांनी गोरखपूर पोलिसांकडे लेखी तक्रार दाखल केली आहे, त्यानंतर पोलिसांनी तपास सुरू केला आहे.
खासदार रवी किशन यांचे स्वीय सचिव शिवम द्विवेदी यांना एका अनोळखी नंबरवरून फोन आला तेव्हा हे संपूर्ण प्रकरण उघडकीस आले. कॉल उचलताच, दुसऱ्या बाजूच्या व्यक्तीने रवी किशन यांना शिवीगाळ करण्यास सुरुवात केली आणि उघडपणे जीवे मारण्याची धमकी दिली.
धमकीचे कारण नेमके काय?
खासदाराचे सचिव शिवम द्विवेदी यांच्या मते, फोन करणाऱ्या अजय यादवने आरोप केला की रवी किशन यांनी यादवांबद्दल अपमानास्पद टिप्पणी करतात. जेव्हा सचिवांनी हे नाकारले आणि म्हटले की खासदार कधीही कोणत्याही जाती किंवा समुदायाविरुद्ध बोलले नाहीत, तेव्हा आरोपी आणखी संतापला. आरोपीने फोनवरून सांगितले की तो खासदाराला गोळ्या घालणार आहे आणि त्याच्या प्रत्येक हालचालीची माहिती असल्याचा दावाही केला. या घटनेमुळे चांगलीच खळबळ उडाली.
पोलिसांकडून घटनेचा तपास
धमकीचा फोन आल्यानंतर खासदाराचे वैयक्तिक सचिव शिवम द्विवेदी आणि पीआरओ पवन दुबे यांनी ताबडतोब गोरखपूरच्या एसएसपींची भेट घेतली. त्यांनी घटनेची सविस्तर माहिती देणारी लेखी तक्रार दाखल केली. आरोपींवर कठोर कायदेशीर कारवाई करण्याची आणि खासदार रवी किशन यांची सुरक्षा वाढवण्याची मागणी त्यांनी केली.
कोण आहेत रवि किशन ?
रवी किशन हे भारतीय अभिनेते, गायक आणि राजकारणी आहेत. त्यांचा जन्म उत्तर प्रदेशातील जौनपूर येथे झाला. त्यांनी हिंदी, भोजपुरी, तेलुगू आणि कन्नड चित्रपटांत काम केले असून ते भोजपुरी चित्रपटसृष्टीतील सर्वाधिक लोकप्रिय अभिनेत्यांपैकी एक आहेत. रवी किशन यांनी “बिग बॉस” या टीव्ही शोमुळेही प्रसिद्धी मिळवली. भारतीय जनता पक्षाचे ते खासदार आहेत.
