कॅनडा- अयोध्येतील श्रीरामलल्ला प्राणप्रतिष्ठेच्या दुसऱ्या वर्धापनदिनानिमित्त 17 जानेवारी 2026 रोजी कॅनडातील हॅलिफॅक्स येथे तिसऱ्या वार्षिक श्री राम महोत्सवाचे आयोजन करण्यात आलं होतं. हा कार्यक्रम हॅलिफॅक्स हिंदू सोसायटी आणि अटल यांच्या संयुक्त पुढाकारातून पार पडला. या कार्यक्रमाअंतर्गत सायंकाळी भक्तिभावाने सुंदरकांड पठण पार पडलं. त्यानंतर प्रभू श्रीरामांसाठी आयोजित भजनाच्या कार्यक्रमामुळे संपूर्ण वातावरण भक्तीमय झालं होतं. आनंद, श्रद्धा आणि भक्तीचा भाव कार्यक्रमाच्या शेवटपर्यंत जाणवत राहिला.

एकतेचा संदेश…

महोत्सवात सांस्कृतिक सादरीकरणांनी विशेष आकर्षण ठरवले. रुशा यांनी सादर केलेले कथक नृत्य तसेच रिदम रॉकर्सच्या समूह सादरीकरणाने उपस्थितांची मने जिंकली. भारतीय परंपरा आणि आधुनिक सादरीकरण यांचा सुंदर समन्वय यावेळी पाहायला मिळाला. श्री राम महोत्सवाअंतर्गत आयोजित केलेल्या या कार्यक्रमाचे आणखी एक वैशिष्ट्य म्हणजे सामुदायिक एकतेचा संदेश. सलग दुसऱ्या वर्षी मॅरिटाईम शीख सोसायटी (MSS) यांनी राम महोत्सवासाठी आपली स्वयंपाकगृह सेवा खुली ठेवली आणि प्रसाद तयार करण्यासाठी पूर्ण सहकार्य केले. करुणा, सेवा आणि निस्वार्थ भावनेतून उभ्या राहिलेल्या या सहभागाने सर्वांचे लक्ष वेधून घेतलं.

कुटुंबाचा सहभाग

हॅलिफॅक्स हिंदू सोसायटीने या महोत्सवात सामील झालेल्या सर्व कुटुंबांचे आभार मानले. सर्वांच्या उपस्थितीमुळे हा कार्यक्रम अधिक आनंदाने आणि एकोप्याने पार पडला. IFCNS, त्रिवेणी इव्हेंट्स, बंगाली इन हॅलिफॅक्स (BIH), हिंदू स्वयंसेवक संघ (HSS) आणि विश्व हिंदू परिषद कॅनडा (VHP कॅनडा) यांच्या सातत्यपूर्ण सहकार्यामुळे हा उत्सव शक्य झाल्याचे आयोजकांनी सांगितले. आयोजकांच्या मते, हा महोत्सव केवळ धार्मिक कार्यक्रम नाही, तर तो सद्भावने, सेवा आणि एकतेच्या बंधनाचे प्रतीक आहे. हा बंध भविष्यात अधिक दृढ व्हावा, अशी अपेक्षाही व्यक्त करण्यात आली. प्रभू श्रीरामांचे मूल्य — न्याय, करुणा आणि सत्य — केवळ भारतापुरते मर्यादित नाहीत, हेच यावरुन स्पष्ट होतं. जगभरातील हिंदू समाज आजही त्या मूल्यांशी जोडलेला असून, श्रद्धा आणि समर्पणाच्या भावनेने आपली ओळख जपत आहे.