Shahrukh Khan : शाहरुख खानची कॉलेज मार्कशीट झाल्याचा दावा सोशल मीडियावर जोरदार व्हायरल होत आहे. सिनेमा क्षेत्रातील ‘बादशाह’ म्हणून ओळखला जाणारा शाहरुख फक्त अभिनयातच नव्हे तर शिक्षणातही हुशार होता, ही चर्चा आता पुन्हा एकदा रंगू लागली आहे. चाहत्यांनी शेअर केलेल्या जुन्या मार्कशीटनुसार शाहरुखने कॉलेज काळात अनेक विषयांमध्ये चमकदार कामगिरी केली होती. त्यावर दिसणारे गुण पाहून अनेकांना आश्चर्य वाटत असून, शाहरुख इतका अभ्यासू होता का, असा प्रश्न अनेकांनी उपस्थित केला आहे.

कोणत्या कॉलेजमध्ये शिकला शाहरुख (Shahrukh Khan)

सोशल मीडियावर फिरत असलेल्या या मार्कशीटनुसार शाहरुखने दिल्लीतील हंसराज कॉलेजमध्ये बीए ऑनर्स (इकॉनॉमिक्स) शिक्षण घेतले होते. 1985 ते 1988 या तीन वर्षांच्या कालावधीत त्याने आपले ग्रॅज्युएशन पूर्ण केले. व्हायरल मार्कशीट पाहता शाहरुखने इलेक्टिव्ह पेपरमध्ये तब्बल 92 गुण मिळवले होते. ही त्या मार्कशीटमधील सर्वाधिक नोंदवलेली गुणसंख्या असल्याचे दिसते. गणितात 78 आणि फिजिक्समध्येही 78 गुण मिळाल्याने त्याचे विज्ञान आणि अंकगणितातील प्रभुत्व स्पष्ट होते. इंग्रजीत मात्र त्याला 51 गुण मिळाल्याचे दिसते, जे त्या काळासाठी सरासरी मानले जातात. तरीही इतर विषयांतील त्याची कामगिरी विशेष कौतुकास्पद आहे. Shahrukh Khan

शाहरुख टॉपर असावा

या मार्कशीटमध्ये शाहरुखची जन्मतारीख 2 नोव्हेंबर 1965 अशी नोंद आहे. वडिलांचे नाव मीर ताज मोहम्मद असल्याचे त्यावर स्पष्ट लिहिलेले आहे. मार्कशीटवर एक जुना फोटोही छापलेला आहे, ज्यामुळे अनेकांना ही मूळ मार्कशीट असल्याचा अधिक विश्वास बसतो. चाहत्यांनी या मार्कशीटवरून शाहरुख किती अभ्यासू होता याबद्दल चर्चा सुरू केली आहे. त्या दशकात 78 किंवा 92 सारखे गुण मिळवणे हे मोठे यश मानले जात होते, त्यामुळे शाहरुख कॉलेजमध्ये टॉपर असावा, असा अंदाज अनेकजण व्यक्त करत आहेत.

अभिनय क्षेत्रात प्रवेश करतानाही शाहरुखने पहिल्याच पावलात आपला ठसा उमटवला होता. 1992 मध्ये आलेल्या त्याच्या ‘दीवाना’ या डेब्यू चित्रपटाने बॉक्स ऑफिसवर उल्लेखनीय कामगिरी केली. त्याआधी शाहरुखने काही लोकप्रिय टीव्ही मालिकांमध्ये भूमिका साकारल्या होत्या. मात्र, मोठ्या पडद्यावर आल्यावर त्याला खरी ओळख मिळाली. आज शाहरुखला ‘बादशाह’ म्हणतात, पण त्याच्या भूतकाळातील शैक्षणिक प्रवासाचा हा पैलू पाहता, तो अभ्यासातही यथार्थ अर्थाने बादशाहच होता, अशी चर्चा पुन्हा छेडली जात आहे.

या व्हायरल मार्कशीटमुळे शाहरुखचा विद्यार्थी काळ, त्याची मेहनत आणि त्याची बौद्धिक क्षमता पुन्हा एकदा चर्चेत आली आहे. अभिनयात गाठलेले शिखर असो किंवा शिक्षणात केलेली कामगिरी असो, शाहरुखने प्रत्येक क्षेत्रात स्वतःला सिद्ध केले आहे, याचा हा आणखी एक पुरावा आहे.