Shashank Ketkar : मराठी टेलिव्हिजन जगतात सोमवारी गंभीर चर्चेला तोंड फुटले, कारण लोकप्रिय अभिनेता शशांक केतकरने नामांकित निर्माता मंदार देवस्थळी यांनी मोठ्या प्रमाणात आर्थिक अडथळे निर्माण केल्याचा आरोप सार्वजनिकपणे केला. शशांकने या प्रकरणाबद्दल यापूर्वी सोशल मीडियावर सूचना दिली होती की, 5 जानेवारी 2026 पर्यंत रक्कम मिळाली नाही तर सर्व पुरावे जाहीर केले जातील. दिलेल्या अंतिम तारखेपर्यंतही पेमेंट न मिळाल्याने त्याने अखेर विस्तृत व्हिडिओ जाहीर करत निर्मात्याचे चॅट्सही सार्वजनिक केले.
काय म्हणाला शशांक
शशांकच्या मते, निर्माता सतत पेमेंट देण्याबाबत खोट्या आश्वासन देत होता. काहीवेळा भावनिक शब्द वापरून कलाकारांना शांत ठेवण्याचा प्रयत्न केला जात होता. “पैशाचा विषय काढला की समोरचा भावगीत म्हणायला लागतो, डार्लिंग म्हणतो, बाळा म्हणतो, पण प्रत्यक्षात पैसे मिळत नाहीत,” असे शशांकने स्पष्ट केले. त्याचबरोबर, पाच लाखांसारखी रक्कम त्याच्यासाठी महत्त्वाची असल्याचे तो म्हणतो. Shashank Ketkar
‘हे मन बावरे’ मालिकेसाठी तो काम करीत असताना, दैनंदिन मानधनाचा काही भाग त्याला अनेक वेळा मागणी केल्यानंतर मिळाला. परंतु त्यात कापलेला TDS आजही जमा न झाल्याचा त्याने गंभीर आरोप केला. म्हणजे, कंपनीने TDS कापला परंतु तो सरकारकडे जमा केला नाही, असा दुहेरी गुन्हा केल्याचे शशांकचे म्हणणे आहे. या समस्येचा सामना फक्त त्यालाच नाही, तर अनेक कलाकार आणि तंत्रज्ञ यांनाही करावा लागत असल्याची माहिती त्याने दिली. काहींचे मुद्दल व TDS दोन्ही अद्याप बाकी असल्याचेही त्याने नमूद केले.
कोणते चॅट शेअर केले
अक्टोबर ते नोव्हेंबर 2025 दरम्यानचे चॅट्सही शशांकने सार्वजनिक केले आहेत. या स्क्रीनशॉट्समध्ये प्रत्येकवेळी पेमेंट विचारल्यावर निर्माता “आजच देतो,” “उद्या निश्चित देतो,” “अडचण आहे, थोडा वेळ द्या,” अशी उत्तरं देत असल्याचे दिसते. काही ठिकाणी निर्मात्याने अत्यंत विनवण्या करून वेळ मागितल्याचेही या चॅट्समध्ये दिसून येते. मात्र प्रत्यक्षात रक्कम हस्तांतरित झाल्याचे कोणतेच पुरावे नाहीत.
शशांकने आपल्या व्हिडिओमध्ये सांगितले की, तो आता कायदेशीर कारवाईसाठी पुढे जाणार आहे. पण हा व्हिडिओ करण्यामागचा मुख्य उद्देश म्हणजे, उद्योगात असे प्रकार कसे घडतात, कलाकारांना कसे दिशाभूल केले जाते, आणि आर्थिक पारदर्शकतेचा अभाव किती मोठा प्रश्न आहे, हे सर्वांसमोर आणणे. शशांकने म्हटले की, “ही माझी लढाई आहे, पण अनेकांचे आवाज दाबले जातात. अशा पॅटर्नपासून सगळ्यांनी सावध राहायला हवे.”
या संपूर्ण प्रकरणावर अद्याप मंदार देवस्थळी किंवा त्यांच्या टीमकडून कोणतीही अधिकृत प्रतिक्रिया आलेली नाही. मराठी मनोरंजन क्षेत्रात मात्र या खुलाशांनी जोरदार चर्चा रंगली असून, अनेक कलाकारांनी शशांकच्या धाडसाचे समर्थन केले आहे.
