अवघ्या देशात गेल्या काही महिन्यांपासून बिहार विधानसभेच्या निवडणुकांची चर्चा सुरू होती. त्याबाबत आता एक मोठी अपडेट समोर आली आहे. एनडीएचं जागा वाटप आज निश्चित झालं असलं तरी यासंदर्भातील घोषणा उद्या होण्याची शक्यता आहे. बिहार विधानसभेच्या पहिल्या टप्प्यातील निवडणुकीसाठी उमेदवारी अर्ज दाखल करण्यासाठी 10 ऑक्टोबरपासून सुरुवात झाली आहे.

पहिल्या टप्प्यातील निवडणुकीसाठी उमेदवार 17 ऑक्टोबरपर्यंत अर्ज दाखल करु शकतात. तर, उमेदवारी अर्ज मागं घेण्याची अंतिम तारीख 20 ऑक्टोबर आहे. बिहार मध्ये पहिल्या टप्प्यातील मतदान 6 नोव्हेंबरला होणार आहे.

एनडीएचं जागावाटप जवळपास निश्चित

बिहार विधानसभा निवडणुकीसाठी राजकीय पक्षांची मोर्चेंबांधणी सुरु आहे. सत्ताधारी एनडीएचा जागा वाटपाचा फॉर्म्युला निश्चित झाला आहे. सूत्रांच्या माहितीनुसार जदयू सर्वाधिक जागा लढणार आहे. जदूयनंतर भाजप जागा लढेल. नितीशकुमार यांचा पक्ष जदयू 102 जागा लढवेल. भाजप 101 जागांवर निवडणूक लढवेल. केंद्रीय मंत्री चिराग पासवान यांच्या लोक जनशक्ती पार्टी रामविलास पक्षाला 25 जागा मिळू शकतात. केंद्रीय मंत्री जीतन राम मांझी यांच्या हिंदुस्थानी आवाम मोर्चाला 8 जागा मिळतील. तर उपेंद्र कुशवाह यांच्या आरएलएम पक्षाला 7 जागा मिळतील.