भारतामध्ये रस्ते अपघातांची संख्या कमी करण्यासाठी आणि वाहनचालकांमध्ये शिस्त निर्माण करण्यासाठी केंद्र सरकारने मोठे पाऊल उचलले आहे. वाहतूक मंत्रालयाने जारी केलेल्या नवीन नियमांनुसार, जर एखादा वाहनचालक एका वर्षाच्या कालावधीत पाच किंवा त्यापेक्षा जास्त वेळा वाहतूक नियमांचे उल्लंघन करतो, तर त्याचा ड्रायव्हिंग लायसन्स तीन महिन्यांसाठी निलंबित करण्याचा अधिकार आता आरटीओ आणि जिल्हा परिवहन कार्यालयांना मिळणार आहे.
हा नियम 1 जानेवारीपासून लागू झाला असून, मंत्रालयाचा दावा आहे की हे पाऊल देशातील वाहतुकीत शिस्तबद्धता आणेल. आजवर चालक दंड भरून सुटण्याच्या मानसिकतेत राहत होते, परंतु आता वारंवार नियम मोडल्यास त्यांना प्रत्यक्ष ड्रायव्हिंगपासून दूर राहावे लागणार आहे, हे स्पष्ट झाले आहे.
हे ही वाचा
कारवाईची प्रक्रिया आणि निलंबनाचा कालावधी
निलंबनाच्या कारवाईपूर्वी संबंधित चालकाला नोटीस पाठवून त्याची बाजू सविस्तर ऐकली जाईल. त्यानंतरच अंतिम निर्णय देण्याची प्रक्रिया पूर्ण केली जाईल. या संपूर्ण प्रक्रियेत पारदर्शकता राहावी, यासाठी सुनावणीची तरतूद करण्यात आली आहे. या नियमाचा एक महत्त्वाचा मुद्दा असा आहे की, उल्लंघनाची गणना दरवर्षीच्या कालावधीतच केली जाईल. म्हणजेच, एका वर्षातील उल्लंघने पुढील वर्षात जोडली जाणार नाहीत. दरवर्षीची गणना स्वतंत्र असेल, त्यामुळे चालकाला नवा वर्ष सुरू होताच स्वच्छ रेकॉर्ड मिळेल.
किरकोळ नियमभंगही पडणार महागात
यापूर्वी लायसन्स निलंबित करण्याचे अधिकार केवळ गंभीर गुन्ह्यांपुरते मर्यादित होते. वाहन चोरी, अपहरण, प्रवाशांवर हल्ला, अतिवेग, ओव्हरलोडिंग यांसारख्या गुन्ह्यांसाठीच कठोर कारवाई केली जात असे. पण आता हेल्मेट न घालणे, सीटबेल्ट न लावणे किंवा लाल सिग्नल तोडणे यासारख्या तुलनेने छोटे वाटणारे पण धोकादायक नियमभंगही वारंवार घडल्यास चालकाला “सवयीचा गुन्हेगार” म्हणून घोषित केले जाऊ शकते.
सरकारचे मत आहे की अशा किरकोळ चुका अनेकदा मोठ्या अपघातांना कारणीभूत असतात. हेल्मेट किंवा सीटबेल्ट न घातल्याने अपघातात होणाऱ्या मृत्यूंची संख्या प्रचंड वाढते, त्यामुळे या नियमांना कडक अंमलबजावणीची गरज होती.
तांत्रिक अडचणी आणि तज्ञांच्या प्रतिक्रिया
नवीन कायद्याला अनेक तज्ज्ञांनी पाठिंबा दर्शवला असला तरी त्याच्या प्रभावी अंमलबजावणीबाबत काही शंका व्यक्त करण्यात येत आहेत. वाहतूक विषयातील काही जानकारांचे मत आहे की, देशातील बहुतांश शहरांमध्ये सीसीटीव्ही कॅमेरे, चलन प्रक्रिया आणि तांत्रिक पायाभूत सुविधा अजूनही सक्षम झालेल्या नाहीत. अशा परिस्थितीत कॅमेऱ्यांवर आधारित दंड न्यायालयात आव्हान देणे सोपे होईल आणि निलंबनाची कारवाई टिकून राहण्याची शक्यता कमी होईल.
दिल्लीचे माजी उपपरिवहन आयुक्त अनिल छिकारा यांनीही हे नियम आवश्यक असल्याचे मान्य केले, पण त्याबाबत मोठा प्रश्न अंमलबजावणीचा असल्याचे सांगितले. त्यांनी असेही म्हटले की, काही लोक सतत धोकादायक ड्रायव्हिंग करतात आणि त्यांना पकडण्यासाठी मजबूत तांत्रिक सुविधा, स्पष्ट नोंदी आणि सतत देखरेख आवश्यक आहे.
दरवर्षी देशात हजारो अपघात वाहनचालकांच्या बेफिकिरीमुळे आणि नियमांचा अवमान केल्यामुळे घडत आहेत. सरकारचे हे नवीन पाऊल वाहनचालकांना नियम पाळण्यास भाग पाडेल, असा विश्वास व्यक्त केला जात आहे. या नियमामुळे केवळ मोठ्या शहरांमध्येच नाही तर ग्रामीण भागातही वाहतुकीची शिस्त सुधारेल, अशी अपेक्षा आहे.