दिल्ली एनसीआरमध्ये राहणाऱ्या नागरिकांसाठी महत्त्वाची बातमी आहे. दिल्ली सरकार आणि वायु गुणवत्ता व्यवस्थापन आयोग (CAQM) यांनी एक मोठा निर्णय घेतला आहे. 1 जुलै 2025 पासून दिल्लीत 10 वर्षांहून अधिक जुन्या डिझेल आणि 15 वर्षांहून अधिक जुन्या पेट्रोल वाहनांना इंधन पंपांवर पेट्रोल-डिझेल भरता येणार नाही.

ANPR कॅमऱ्यांद्वारे ओळख

हा निर्णय लागू करण्यासाठी दिल्लीमधील 500 इंधन पंपांवर ANPR (Automatic Number Plate Recognition) कॅमेरे बसवले गेले आहेत. हे कॅमेरे वाहन क्रमांक वाचून त्यांची नोंदणी, इंधनाचा प्रकार आणि वाहनाची वयोमर्यादा तपासतात. वयोमर्यादा ओलांडलेल्या वाहनांना ‘End of Life’ (EOL) म्हणून चिन्हित केले जाईल आणि त्या वाहनांना इंधन भरता येणार नाही. हे अलर्ट थेट इंधन पंपांपर्यंत पोहोचवले जातील.

1 नोव्हेंबरपासून NCR च्या इतर शहरांतही अंमलबजावणी

हा नियम 1 नोव्हेंबर 2025 पासून गुरुग्राम, फरीदाबाद, गाझियाबाद, गौतम बुद्ध नगर आणि सोनीपत या NCR च्या शहरांमध्ये लागू होणार आहे. तर 1 एप्रिल 2026 पासून संपूर्ण NCR क्षेत्रात अंमलबजावणी केली जाईल.

4.9 लाख वाहने EOL म्हणून चिन्हित

आत्तापर्यंत ANPR प्रणालीने 3.63 कोटींपेक्षा अधिक वाहनांची तपासणी केली आहे, त्यापैकी 4.90 लाख वाहने जीवनावधी संपलेल्या (EOL) स्वरूपात नोंदवली गेली आहेत.

प्रदूषणावर कडक नियंत्रण

BS मानकांपूर्वीचे जुने वाहन वायुप्रदूषणाचा मुख्य स्रोत मानले जातात. या निर्णयामुळे हवेतील प्रदूषणाचे प्रमाण कमी होण्यास मदत होईल. नियम मोडणाऱ्या वाहनांवर दंड, वाहन जप्ती किंवा स्क्रॅप करण्यासारख्या कारवाई होणार आहे.