UP Crime News : उत्तर प्रदेशातील झाशीमधून एक धक्कादायक घटना समोर आली आहे. माणुसकीला काळीमा फासणाऱ्या या घटनेने संपूर्ण जिल्हा हादरुन गेला आहे. रेल्वेच्या एका निवृत्त कर्मचाऱ्याने आपल्या लिव्ह-इन पार्टनरची हत्या केली. पुरावे मिटविण्यासाठी सात दिवसांपर्यंत तो घराच्या आत मृतदेहाचे तुकडे जाळत होता. आरोपी उरलेली राख आणि अर्धवट जळालेले शरीराचे अवयव ‘निळ्या पेटीत’ भरून त्याची विल्हेवाट लावण्यासाठी बाहेर पडला तेव्हा हा भयानक कट उघडकीस आला.
कट कसा उघडकीस आला?
शनिवारी रात्री २ वाजेच्या सुमारास जयसिंग पाल या ऑटोचालकाच्या सतर्कतेने या हत्येचा पर्दाफाश झाला. आरोपी बृजभान याने ब्रह्मनगर ते मिनर्व्हा स्क्वेअरसाठी ४०० रुपयात एक ऑटो बुक केली होती. तो त्याच्यासोबत एक जाड निळा बॉक्स घेऊन आला होता. प्रवासादरम्यान, बॉक्समधून तीव्र वास येऊ लागला आणि घाणेरडे पाणी गळू लागले. ऑटोचालकाला बॉक्समध्ये काहीतरी संशयास्पद असल्याचा संशय आला. ड्रायव्हरच्या म्हणण्यानुसार, आरोपीसोबत आणखी तीन-चार लोक होते, ज्यांनी ड्रममध्ये घरगुती वस्तू असल्याचा दावा केला. जेव्हा त्याचा संशय वाढला तेव्हा ड्रायव्हरने पोलिसांना माहिती दिली.
नेमकं काय घडलं?
झाशी शहराच्या एका शांत गल्लीत रेल्वेचा निवृत्त कर्मचारी राहत होता. निवृत्त झाल्यानंतर आयुष्य शांततेत जाईल असं त्याला वाटत होतं. पण त्याच्या आयुष्यात एका महिलेची एन्ट्री झाली आणि सर्व काही बदलून गेलं. ४० वर्षांची प्रीती निवृत्त रेल्वे कर्मचारी बृजभानसोबत लिव्ह-इनमध्ये राहत होती. तिसऱ्या पत्नीप्रमाणे त्यांच्यातील नातं होतं. सुरुवातीला सर्व काही चांगलं सुरू होतं. पण प्रेमाच्या या नात्यात हळूहळू संशयाचं आणि वादाचे विष पसरलं गेलं. एका काळोख्या रात्री महिला आणि निवृत्त रेल्वे कर्मचाऱ्यामध्ये टोकाचा वाद झाला. रागाच्या भरात विवेक हरवलेला रेल्वे कर्मचारी बृजभानने आपल्याच जोडीदारावर हल्ला केला. त्याचा संताप इतका अनावर झाला की, त्याने तिची हत्या केली. पण गुन्हा करून पळून जाण्याऐवजी, तो लपवण्यासाठी त्यांनी जे पाऊल उचलले, ते ऐकून पोलिसांच्याही अंगावर काटा आला.
हत्तेचा पुरावा नष्ट करण्यासाठी बृजभानने निर्घृणतेची सीमा ओलांडली. त्याने मृतदेहाचे तुकडे केले आणि ते घरातच जाळण्याचा प्रयत्न केला. घराच्या खिडक्यांमधून येणारा विचित्र वास आणि धूर पाहून शेजाऱ्यांना संशय आला. त्यांनी तातडीने पोलिसांना बोलावलं. जेव्हा पोलीस दरवाजा तोडून आत शिरले, तेव्हा समोरचे दृश्य पाहून अधिकारीही हादरले. घरात रक्ताचा सडा आणि अर्धवट जळालेले मानवी अवशेष पडलेले होते.
बृजभान तिथेच सुन्न अवस्थेत बसला होता. त्याच्या डोळ्यात ना पश्चात्ताप होता, ना भीती; फक्त एक भयाण शांतता होती. निवृत्तीनंतरचे सन्मानाचे आयुष्य जगण्याऐवजी, बृजभानने क्रौर्याचा मार्ग निवडला. एका क्षणाच्या रागाने केवळ एका जीवाचा अंत केला नाही, तर माणुसकीलाही काळिमा फासला. पोलिसांनी त्याला अटक केली असून, या घटनेने संपूर्ण झाशी शहर हादरून गेले आहे.
