नाशिक जिल्ह्यातील सप्तश्रृंगी गड आणि त्र्यंबकेश्वर मंदिर येथे दर्शनासाठी दररोज मोठ्या प्रमाणात भाविकांची गर्दी होत आहे. सप्तश्रृंगी देवी हे उत्तर महाराष्ट्रातील प्रमुख शक्तीपीठ असून नवरात्र, सुट्ट्या आणि नववर्षाच्या काळात येथे लाखो भाविक दाखल होतात. त्याचप्रमाणे त्र्यंबकेश्वर हे बारा ज्योतिर्लिंगांपैकी एक असल्याने देशभरातून भाविक येथे दर्शनासाठी येतात. श्रावण महिना, सोमवार, महाशिवरात्री यावेळी गर्दी अधिक वाढते. वाढत्या भाविक संख्येमुळे वाहतूक, दर्शन रांगा आणि सुरक्षेचे आव्हान निर्माण होत असून प्रशासनाकडून विशेष नियोजन केले जात आहे. सरत्या वर्षाला निरोप देताना देखील गर्दी वाढत असल्याने आता दर्शनाच्या वेळेमध्ये मोठे बदल करण्यात आले आहेत.
सप्तश्रृंगी देवीच्या दर्शन वेळेत बदल
नाताळच्या सुट्ट्या, शाकंभरी नवरात्रोत्सव आणि सरत्या वर्षाला निरोप देत नववर्षाच्या स्वागतासाठी नाशिक जिल्ह्यातील शक्तिपीठ आणि ज्योतिर्लिंगाच्या दर्शनासाठी भाविकांचा ओघ वाढला आहे. ही तुडुंब गर्दी लक्षात घेता, प्रशासनाने भाविकांच्या सोयीसाठी मंदिर दर्शनाच्या वेळेत मोठे बदल केले आहेत. त्यामुळे भाविकांना दिलासा मिळणार आहे. कळवण तालुक्यातील श्रीक्षेत्र सप्तश्रृंगगड येथे दर्शनासाठी येणाऱ्या लाखो भाविकांना सुलभ आणि समाधानकारक दर्शन मिळावे, यासाठी देवस्थान प्रशासनाने मंदिर 24 तास खुले ठेवण्याचा महत्त्वपूर्ण निर्णय घेतला आहे. तर मंगळवार, 30 डिसेंबर 2025 ते रविवार, 4 जानेवारी 2026. या पाच दिवसांच्या काळात मंदिर दर्शनासाठी एक क्षणही बंद होणार नाही, ज्यामुळे भाविकांना गर्दीच्या त्रासाशिवाय दर्शन घेता येईल.
