Instagram Reels आज सोशल मीडियावरील सर्वात लोकप्रिय फीचर बनले आहे. फिटनेस टिप्स, मनोरंजनाचे व्हिडिओ किंवा शैक्षणिक कंटेंट Reels च्या माध्यमातून विविध प्रकारचे शॉर्ट व्हिडिओ लोकांपर्यंत पोहोचत आहेत. भारतात Meta ने गेल्या वर्षी “Reels-First” दृष्टिकोनाची चाचणी घेतली होती, ज्यामध्ये युजर्सच्या आवडी आणि पाहण्याच्या सवयींनुसार व्हिडिओ सुचवले जातात.

मात्र अनेकदा फीडमध्ये वारंवार एकाच प्रकारचे व्हिडिओ दिसू लागतात किंवा अजिबात आवड नसलेला कंटेंट समोर येतो. अशावेळी Instagram चा अल्गोरिदम रीसेट करणे हा एक चांगला पर्याय ठरू शकतो.

Reels चा अल्गोरिदम का बिघडतो?

Instagram चा अल्गोरिदम पूर्णपणे युजरच्या इंटरॅक्शनवर आधारित असतो. तुम्ही कोणता Reel पूर्ण पाहता, कोणता पुन्हा पाहता, कुठे लाईक किंवा कमेंट करता या सर्व गोष्टींवरून अॅप तुमची आवड ओळखते. कधी नकळत केलेले इंटरॅक्शनही अल्गोरिदमला गोंधळात टाकतात आणि त्याच प्रकारचे व्हिडिओ वारंवार दिसू लागतात.

याशिवाय वेळेनुसार लोकांच्या आवडी बदलत असतात. काही महिन्यांपूर्वी आवडलेला कंटेंट आजही आवडेलच असे नाही. कधी फीडमध्ये त्रासदायक किंवा निरुपयोगी व्हिडिओही दिसतात. अशा वेळी अल्गोरिदमला नवीन सुरुवात देणे गरजेचे ठरते.

Instagram मध्ये अल्गोरिदम रीसेट करण्याची सोपी पद्धत

Instagram ने आता अॅपमध्येच सुचवलेला कंटेंट रीसेट करण्याचे फीचर दिले आहे. यासाठी सर्वप्रथम Instagram अॅप उघडा आणि तुमच्या प्रोफाइलवर जा. त्यानंतर वरच्या उजव्या बाजूला असलेल्या तीन लाईन्सच्या मेन्यूवर टॅप करा. येथे Content Preferences हा पर्याय दिसेल.

Content Preferences मध्ये गेल्यानंतर Reset Suggested Content हा पर्याय निवडा. स्क्रीनवर दिसणारी माहिती काळजीपूर्वक वाचा आणि कन्फर्म करा. शेवटी Reset Suggested Content वर टॅप करताच प्रक्रिया पूर्ण होईल.

रीसेटनंतर काय बदल होईल?

रीसेटनंतर Instagram हळूहळू तुमच्या नवीन आवडीनुसार Reels दाखवू लागेल. सुरुवातीला विविध विषयांवरील व्हिडिओ दिसू शकतात, जेणेकरून अॅप तुमच्या ताज्या पसंती समजू शकेल. लक्षात ठेवा, एकदा रीसेट केल्यानंतर तो निर्णय मागे घेता येत नाही. जर तुम्हीही सारखेच Reels पाहून कंटाळले असाल, तर हा उपाय वापरून तुमची Instagram फीड पुन्हा फ्रेश आणि रंजक बनवू शकता.