आयपीएल २०२६ चे सामने बेंगळुरूतील एम चिन्नास्वामी स्टेडियमवर खेळवले जातील की नाही याबद्दल अनिश्चितता कायम आहे. आरसीबीने आयपीएल २०२५ चे विजेतेपद जिंकले आणि संघासाठी विजयी परेडचे नियोजन करण्यात आले होते. तथापि, मैदानाबाहेर झालेल्या चेंगराचेंगरीत ११ जणांचा मृत्यू झाला. तेव्हापासून चिन्नास्वामी स्टेडियमवर कोणतेही प्रमुख स्तरावरील सामने खेळवले गेले नाहीत. दरम्यान, रॉयल चॅलेंजर्स बंगळुरूने सुरक्षा सुधारण्यासाठी एआय-सक्षम कॅमेरे बसवण्याचा प्रस्ताव दिला आहे.

स्टेडियममध्ये ३०० ते ३५० एआय-सक्षम कॅमेरे बसवण्याचा प्रस्ताव

कर्नाटक स्टेट क्रिकेट असोसिएशन (KSCA) ला लिहिलेल्या पत्रात आरसीबी फ्रँचायझीने चिन्नास्वामी स्टेडियममध्ये ३०० ते ३५० एआय-सक्षम कॅमेरे बसवण्याचा प्रस्ताव दिला आहे. या कॅमेर्‍यांच्या माध्यमातून प्रेक्षकांची हालचाल, रांगा तसेच एक्झिट परिसरावर प्रभावीपणे नजर ठेवता येईल. फ्रँचायझीच्या मते, यामुळे विशेषतः आयपीएल आणि इतर मोठ्या क्रीडा कार्यक्रमांचे सुरळीत आणि सुरक्षित आयोजन सुनिश्चित होण्यास मदत होईल.

आरसीबीचा हा प्रस्ताव अशा वेळी समोर आला आहे, जेव्हा काही अहवालांनुसार आयपीएल २०२६ मध्ये आरसीबीचे होम सामने पुण्यात खेळवले जाण्याची शक्यता वर्तवली जात आहे. महाराष्ट्र क्रिकेट असोसिएशनने याआधीच स्पष्ट केले आहे की डिसेंबर महिन्याच्या अखेरच्या आठवड्यात बेंगळुरू आणि राजस्थान संघ एमसीए स्टेडियमच्या पाहणीसाठी आले होते.

एआय कॅमेरे बसवण्याचा संपूर्ण खर्च

रॉयल चॅलेंजर्स बेंगळुरू फ्रँचायझीने स्पष्ट केले आहे की मैदानात एआय कॅमेरे बसवण्याचा संपूर्ण खर्च ते स्वतः उचलणार आहेत. हा खर्च सुमारे ४.५ कोटी रुपयांपर्यंत जाऊ शकतो, असे सांगितले जात आहे. मात्र, आयपीएल २०२६ मध्ये आरसीबी आपले होम सामने नेमके कुठे खेळणार, याबाबत अद्याप कोणताही अंतिम निर्णय झालेला नाही. चिन्नास्वामी स्टेडियमवर शिक्कामोर्तब न झाल्यास, बेंगळुरू फ्रँचायझीला आपले होम सामने इतर शहरांमध्ये आयोजित करावे लागण्याची शक्यता आहे.