इंग्लंड क्रिकेट संघाने टी-२० आंतरराष्ट्रीय क्रिकेटमध्ये एक नवा इतिहास रचला आहे. दक्षिण आफ्रिकेविरुद्ध मँचेस्टरमध्ये खेळल्या गेलेल्या मालिकेतील दुसऱ्या टी-२० सामन्यात इंग्लंड संघाने २० षटकांत फक्त २ गडी गमावून ३०४ धावा केल्या. कसोटी खेळणाऱ्या देशाने टी-२० आंतरराष्ट्रीय सामन्यात ३०० धावांचा टप्पा ओलांडण्याची ही पहिलीच वेळ आहे. यासोबतच इंग्लंडने गेल्या वर्षी बांगलादेशविरुद्ध २९७ धावांचा मोठा टप्पा गाठणाऱ्या भारताचा विक्रमही मोडला.
साल्ट आणि बटलरची झंझावाती खेळी
फिल साल्ट आणि जोस बटलर हे इंग्लंडच्या विजयाचे नायक होते. दोघांनीही सलामीच्या भागीदारीत दक्षिण आफ्रिकेच्या गोलंदाजांचे कंबरडे मोडले. बटलरने फक्त ३० चेंडूत ८३ धावा केल्या, ज्यामध्ये ८ चौकार आणि ७ षटकारांचा समावेश होता. साल्टने १४१ धावांची नाबाद खेळी केली. त्याने ६० चेंडूत ही खेळी केली आणि इंग्लंडसाठी टी२० आंतरराष्ट्रीयमधील सर्वात मोठी वैयक्तिक खेळी केली. याआधी त्याचा सर्वोत्तम खेळ ११९ धावा होता.
इतर फलंदाजांचे योगदान
जेकब बेथेलने १४ चेंडूत २६ धावा केल्या, तर कर्णधार हॅरी ब्रूकने २१ चेंडूत ४१ धावा केल्या. इंग्लंडची दुसरी विकेट २२१ धावांवर पडली, परंतु त्यानंतरही इंग्लिश संघाचा धावगती कमी झाली नाही. अखेरपर्यंत साल्ट आणि ब्रूकने संघाला ३०४ धावांच्या विक्रमी धावसंख्येपर्यंत पोहोचवले.
दक्षिण आफ्रिकेची फलंदाजी कोसळली
३०५ धावांचा पाठलाग करताना दक्षिण आफ्रिकेची सुरुवात खूपच खराब झाली. इंग्लंडच्या गोलंदाजांनी सतत विकेट्स घेतल्या आणि विरोधी संघाला १६.१ षटकात १५८ धावांत गुंडाळले. कर्णधार एडेन मार्करामने ४१ धावा केल्या, तर ब्योर्न फोर्टनने ३२ धावा केल्या. डोनोव्हन फरेरा आणि ट्रिस्टन स्टब्सने २३-२३ धावांचे योगदान दिले, परंतु दक्षिण आफ्रिकेचा कोणताही फलंदाज मोठी खेळी करू शकला नाही.
इंग्लंडकडून जोफ्रा आर्चर सर्वात यशस्वी गोलंदाज ठरला, त्याने ३ बळी घेतले. सॅम करन, डॉसन आणि विल जॅक्स यांनीही २-२ बळी घेतले.
तिसऱ्यांदा टी-२० मध्ये ३०० धावांचा टप्पा ओलांडला
टी-२० आंतरराष्ट्रीय इतिहासात एखाद्या संघाने ३०० धावांचा टप्पा ओलांडण्याची ही तिसरी वेळ आहे. तथापि, याआधी फक्त कसोटी नसलेल्या संघांनाच ही कामगिरी करता आली. २०२३ मध्ये नेपाळने मंगोलियाविरुद्ध ३१४ धावा केल्या, तर २०२४ मध्ये झिम्बाब्वेने गांबियाविरुद्ध ३४४ धावा केल्या. आता इंग्लंडने कसोटी राष्ट्र म्हणून या यादीत स्थान मिळवले आहे.
इंग्लंडचे वर्चस्व
इंग्लंडने आता एकदिवसीय आणि टी-२० दोन्ही स्वरूपात सर्वाधिक धावा केल्या आहेत. इंग्लंडने एकदिवसीय सामन्यात नेदरलँड्सविरुद्ध ४९८ धावा केल्या आणि आता टी-२० मध्ये ३०४ धावा केल्या आहेत. या शानदार विजयासह इंग्लंडने मालिका १-१ अशी बरोबरी केली आहे.
