भारत आणि दक्षिण आफ्रिके दरम्यान नवी मुंबई येथे 2025 महिला वनडे विश्वचषकाचा अंतिम सामना खेळला जात आहे. टॉस गमावून प्रथम फलंदाजीस उतरलेल्या टीम इंडियाने 50 षटकांत 298 धावा केल्या. भारतासाठी सलामीवीर शेफाली वर्मा हिने केवळ 78 चेंडूत 87 धावांची झंझावाती खेळी साकारली. मात्र ती शतकापासून थोडक्यात वंचित राहिली. तिची साथीदार स्मृती मंधाना हिने 45 धावा केल्या. दोघींनी मिळून शतकी भागीदारी केली. शेवटी दीप्ती शर्मा आणि ऋचा घोष यांनी दमदार फलंदाजी करत संघाचा स्कोअर 300 च्या जवळ नेला. तथापि, शेवटच्या 5 षटकांत भारताने फक्त 36 धावा केल्या आणि त्यामुळे संघ 300 च्या टप्प्यापार जाऊ शकला नाही.
आफ्रिकेच्या गोलंदाजांचं डेथ ओव्हर्समध्ये जबरदस्त पुनरागमन
एका क्षणी असे वाटत होते की भारतीय संघ सहजपणे 320 धावांपर्यंत पोहोचेल, पण दक्षिण आफ्रिकेच्या गोलंदाजांनी डेथ ओव्हर्समध्ये जबरदस्त पुनरागमन करत भारतीय फलंदाजांना मोठे फटके मारू दिले नाहीत. 45 षटकांत भारताचा स्कोअर 262 धावा होता. तरीदेखील टीम इंडिया 300 चा टप्पा ओलांडू शकली नाही. तरीही हा महिला एकदिवसीय विश्वचषकाच्या इतिहासातील अंतिम सामन्यातील दुसरा सर्वात मोठा संघीय स्कोअर ठरला आहे.
भारताकडून स्मृती मंधाना हिने 58 चेंडूत 8 चौकारांच्या मदतीने 45 धावा केल्या. शेफाली वर्मा हिने 78 चेंडूत 87 धावांची खेळी साकारताना 7 चौकार आणि 2 षटकार लगावले. मागील सामन्यात शतक झळकावणारी जेमिमा रॉड्रिग्ज 37 चेंडूत 24 धावा करून माघारी परतली. तर कर्णधार हरमनप्रीत कौर हिच्या बॅटमधूनही मोठी खेळी दिसली नाही; तिने 29 चेंडूत 2 चौकारांच्या सहाय्याने 20 धावा केल्या.
