IPL 2026 च्या लिलावात आकिब डार हा चर्चेचा केंद्रबिंदू ठरला आहे. दिल्ली कॅपिटल्सने त्यांना तब्बल 8.40 कोटी रुपयांना आपल्या संघात सामील करून घेतले. ८ कोटींपेक्षा जास्त रकमेची मोठी बोली लागलेला आकिब दार नेमका कोण आहे?, असा प्रश्न सध्या सर्वांनाच पडला आहे.
उजव्या हाताने वेगवान गोलंदाजी करणाऱ्या आकिब डारसाठी केवळ दिल्ली कॅपिटल्सच नव्हे, तर सनरायझर्स हैदराबाद आणि रॉयल चॅलेंजर्स बंगळुरू यांनीही जोरदार प्रयत्न केले होते.
आकिब नबी दार हा जम्मू आणि काश्मीरचा
२९ वर्षीय आकिब नबी दार हा जम्मू आणि काश्मीरचा आहे. गेल्या काही महिन्यांत त्याने भारतीय स्थानिक क्रिकेटमध्ये नाव कमावले आहे. आतापर्यंत त्याने सय्यद मुश्ताक अली ट्रॉफीमध्ये सात सामन्यांमध्ये १५ विकेट्स घेतल्या आहेत. या स्पर्धेत त्याचा इकॉनॉमी रेट ८ पेक्षा कमी आहे आणि त्याची मुख्य ताकद चेंडू स्विंग करणे आहे. आकिब नबी हा कोलकाता नाईट रायडर्स आणि सनरायझर्स हैदराबादसाठी नेट बॉलर आहे.
नऊ डावांमध्ये २९ विकेट्स घेतल्या
आकिब नबी दार रणजी ट्रॉफीतदेखील हंगामात चांगली कामगिरी करत आहे. २०२५-२६ रणजी ट्रॉफीच्या पहिल्या टप्प्यात पाच विकेट्स घेणारा तो एकमेव वेगवान गोलंदाज होता. चालू हंगामात त्याने नऊ डावांमध्ये २९ विकेट्स घेतल्या आहेत. त्याच्या कामगिरीमुळे जम्मू आणि काश्मीरला बाद फेरीत प्रवेश मिळाला.
गेल्या रणजी ट्रॉफी हंगामातही आकिब नबी उत्कृष्ट फॉर्ममध्ये होता. त्याने १३.९३ च्या उत्कृष्ट गोलंदाजी सरासरीने ४४ विकेट्स घेतल्या. नबीच्या टी-२० कारकिर्दीवर नजर टाकली तर, त्याने आतापर्यंत ३४ सामन्यांमध्ये ४३ विकेट्स घेतल्या आहेत. त्याच्या २९ लिस्ट ए सामन्यांमध्ये त्याने ४२ विकेट्स घेतल्या आहेत आणि ३५१ धावा केल्या आहेत. त्याच्या प्रथम श्रेणी कारकिर्दीत त्याने ३६ सामने खेळले आहेत, ज्यामध्ये १२५ विकेट्स घेतल्या आहेत आणि फलंदाजीने ८७० धावा केल्या आहेत. त्याच्या नावावर एक अर्धशतक देखील आहे.
