Home Remedies to Get Rid of Bad Breath:  तोंडातून येणारा दुर्गंधी किंवा तोंडातून येणारा वास ही एक सामान्य समस्या आहे, ज्याचा अनेक लोक दररोज सामना करतात. अर्थात ही एक छोटीशी समस्या आहे. पण ती तुम्हाला लाजिरवाणी वाटू शकते. एका रिपोर्टनुसार, जगातील ५० ते ६०% लोक तोंडाच्या दुर्गंधीने ग्रस्त आहेत. आश्चर्याची बाब म्हणजे काही लोक तोंडाच्या स्वच्छतेची काळजी घेतात आणि लसूण किंवा कांदा यांसारखे वास येणारे पदार्थ खात नाहीत, तरीही त्यांच्या तोंडातून दुर्गंधी येते. तज्ज्ञांच्या मते, कधीकधी ही समस्या पोटातील इतर काही घातक आजाराचे लक्षण देखील असू शकते, ज्याकडे दुर्लक्ष करू नये.

तोंडाच्या दुर्गंधीपासून मुक्त कसे व्हावे? तोंडाची दुर्गंधी दूर करण्याचा सर्वोत्तम मार्ग म्हणजे तोंड स्वच्छ ठेवणे असे तज्ज्ञांचे मत आहे. दररोज दात घासणे, प्रत्येक जेवणानंतर चूळ भरणे, जास्त वेळ उपाशी न राहणे, वारंवार पाणी पिणे इत्यादी उपायांमुळे ही समस्या बऱ्याच प्रमाणात टाळता येते. तसेच काही घरगुती उपाय आहेत ज्याद्वारे यातून आराम मिळू शकतो. चला तर मग पाहूया हे उपाय कोणते आहेत.

बडीशेप –

जर पचनक्रिया नीट होत नसल्यामुळे तोंडाची दुर्गंधी येत असेल तर जेवणानंतर दोन्ही वेळा अर्धा चमचा बडीशेप चावा. यामुळे तोंडाची दुर्गंधी दूर होते.

आले-

एका ग्लास पाण्यात आल्याचा रस मिसळून दिवसातून तीन वेळा सकाळी, दुपारी आणि संध्याकाळी गुळण्या केल्याने तोंडाच्या दुर्गंधीपासून आराम मिळतो. त्याचप्रमाणे लिंबाचा रस देखील वापरता येतो.

लवंग-

लवंग हा एक मसाला आहे जो अनेक आजारांवर वापरला जातो. तोंडाच्या दुर्गंधीपासून आराम मिळवण्यासाठी, तुम्ही लवंग आणि ज्येष्ठमध भाजून चावावे.यामुळे लगेच दुर्गंधीपासून आराम मिळेल.

मोहरीचे तेल-

मोहरीच्या तेलात चिमूटभर मीठ मिसळून हिरड्यांना मालिश केल्याने तोंडाची दुर्गंधी कमी होण्यास मदत होते आणि हिरड्या मजबूत होतात.

पुदिना आणि तुळस-

तुळस आणि पुदिन्याची पाने तोंडाच्या दुर्गंधीवर चांगले काम करतात. पुदिन्याची पाने बारीक करून, पाण्यात मिसळून आणि दिवसातून तीन वेळा गुळण्या केल्याने तुम्हाला लवकर आराम मिळू शकतो.

(टीप : वरील माहिती उपलब्ध स्रोतावरून देण्यात आलेली आहे. याच्या तथ्यांबद्दल MP मराठी Breaking कोणताही दावा करीत नाही.)