Apple कंपनी लवकरच आपला पुढील मोठा सॉफ्टवेअर अपडेट iOS 26 जारी करणार आहे. या अपडेटमध्ये अनेक महत्त्वाचे बदल पाहायला मिळणार आहेत. मात्र, सध्या बीटा व्हर्जनमधून समोर आलेल्या एका फिचरने अनेकांचे लक्ष वेधले आहे. या फिचरनुसार, FaceTime कॉल दरम्यान जर कॅमेर्‍यासमोर नग्नता आढळली, तर व्हिडिओ आणि ऑडिओ आपोआप थांबवले जातील.

काय आहे हे नवं फिचर?

एका नव्या रिपोर्टनुसार, iOS 26 च्या बीटा व्हर्जनमध्ये जर FaceTime कॉल दरम्यान कॅमेरा काही संवेदनशील (न्यूड) कंटेंट टिपतो, तर स्क्रीनवर एक चेतावणी संदेश दिसेल. त्यात म्हटलं जाईल, “ऑडिओ आणि व्हिडिओ थांबवण्यात आले आहेत, कारण तुम्ही कदाचित काही संवेदनशील सामग्री दाखवत आहात. जर तुम्ही अस्वस्थ वाटत असाल, तर कॉल संपवू शकता.”

यानंतर वापरकर्त्याला दोन पर्याय दिले जातील:

कॉल पुन्हा सुरू करा

कॉल संपवा

प्रायव्हसी आणि वापरकर्त्यांच्या सुरक्षेवर Apple चा भर

हा नवा फिचर Apple च्या Communication Safety उपक्रमाचा भाग आहे. पूर्वी हे फिचर फक्त कुटुंबातील सदस्य व मुलांसाठी मर्यादित असल्याचे सांगण्यात आले होते. मात्र, बीटा अपडेटनुसार, हा फिचर आता सर्वच iOS वापरकर्त्यांसाठी लागू करण्यात येतो आहे.

युवांसाठी सुरक्षिततेचा विशेष उपाय

WWDC 2025 मध्ये Apple ने स्पष्टपणे सांगितले होते की, iOS 26 मध्ये कुटुंब आणि मुलांच्या डिजिटल सुरक्षेला सर्वोच्च प्राधान्य दिलं जाईल. Photos App मधील Shared Albums मध्येही असा एक फिचर लागू करण्यात आला आहे, ज्यामध्ये अश्लील फोटो आपोआप ब्लर केले जातील.

सगळ्यांवर लागू होईल का हा फिचर?

सध्या तरी हे स्पष्ट झालेलं नाही की iOS 26 चा फायनल व्हर्जन आल्यानंतर हा फिचर सर्वांसाठी कायमस्वरूपी सक्रिय राहणार का. मात्र एक गोष्ट निश्चित आहे Apple आता डिजिटल वेलबीइंग आणि प्रायव्हसीसंदर्भात अधिक जागरूक झाला आहे.

जर तुम्ही iOS 26 चा बीटा वापरकर्ता असाल, तर FaceTime कॉल करताना काहीही ‘संवेदनशील’ दृश्य दिसल्यास तुमचा कॉल काही क्षणांसाठी थांबवला जाऊ शकतो. ही संपूर्ण प्रक्रिया Apple च्या AI आधारित सिस्टमवर आधारित असेल.