बांगलादेशच्या माजी पंतप्रधान बेगम खालिदा झिया यांचे ढाका येथील अपोलो रुग्णालयात उपचारादरम्यान दीर्घ आजाराने निधन झाले. त्या 80 वर्षांच्या होत्या. बांगलादेश नॅशनलिस्ट पार्टी (बीएनपी) च्या अध्यक्षा झिया यांनी मंगळवारी सकाळी 6 वाजता अखेरचा श्वास घेतला, असे त्यांच्या पक्षाने जारी केलेल्या निवेदनात म्हटले आहे. 23 नोव्हेंबर 2025 रोजी हृदय आणि फुफ्फुसाच्या संसर्गामुळे त्यांना रुग्णालयात दाखल करण्यात आले होते आणि गेल्या 36 दिवसांपासून त्यांच्यावर उपचार सुरू होते.
खालिदा झिया यांचे वयाच्या 80 व्या वर्षी निधन
खालिदा यांच्या निधनाची बातमी त्यांच्या बीएनपी पक्षानं एक्स प्लॅटफॉर्मवर जाहीर केली आहे. त्यांचे पती झियाउर रहमान बांगलादेशच्या स्वातंत्र्यलढ्यातील महत्त्वाचे आणि अग्रगण्य व्यक्ती होते. ते 1977 मध्ये बांगलादेशचे राष्ट्राध्यक्ष होते. जेव्हा खालिदा झिया राजकारणात नव्हत्या. त्यांनी स्वत:ला त्यांच्या दोन मुलांच्या संगोपनात वाहून घेतलं होतं. त्यामुळे त्यांना ‘लाजाळू गृहिणी’ असं म्हटलं जात होतं. 1981 मध्ये झियाउर रहमान यांची हत्या झाली. त्यानंतर मात्र खालिदा झिया राजकारणात सक्रिय झाल्या. त्यांनी बांगलादेश नॅशनलिस्ट पार्टीचं (बीएनपी) नेतृत्व केलं. त्या दोनवेळा बांगलादेशच्या पंतप्रधान झाल्या. पहिल्यांदा 1990च्या दशकात आणि नंतर 2000 च्या सुरूवातीच्या दशकात.
खालिदा अनेक आजारांनी होत्या ग्रस्त
बांगलादेशच्या पहिल्या महिला पंतप्रधान झिया यांना बऱ्याच काळापासून यकृताचा सिरोसिस, संधिवात, मधुमेह आणि मूत्रपिंड, फुफ्फुसे, हृदय आणि डोळ्यांशी संबंधित जुनाट आजारांसह अनेक आरोग्य समस्या होत्या. हृदयरोगतज्ज्ञ शहाबुद्दीन तालुकदार यांच्या नेतृत्वाखालील वैद्यकीय मंडळाच्या देखरेखीखाली त्यांच्यावर उपचार सुरू होते, ज्यामध्ये बांगलादेश, ब्रिटन, अमेरिका, चीन आणि ऑस्ट्रेलियातील तज्ज्ञांचा समावेश होता. या महिन्याच्या सुरुवातीला, त्यांना उपचारांसाठी परदेशात नेण्याचा प्रयत्न करण्यात आला होता, परंतु त्यांची प्रकृती गंभीर असल्याने त्यांना हलवता आले नाही.
