Diljit Dosanjh : 1997 साली आलेल्या जेपी दत्तांच्या ‘बॉर्डर’ चित्रपटातील ‘संदेसे आते हैं’ हे गाणे आजही भारतीय भावनांचे प्रतीक मानले जाते. भारतीय सैनिकांच्या त्यागाचा, कुटुंबापासून दूर राहण्याच्या वेदनेचा आणि मातृभूमीवरील प्रेमाचा महत्त्वपूर्ण संदेश देणारे हे गीत प्रेक्षकांच्या हृदयात आजही ताजे आहे. या गाण्याची भावनिक खोली इतकी प्रबळ आहे की त्याला क्लासिकचा दर्जा मिळालेला आहे. आता ‘बॉर्डर 2’च्या तयारीदरम्यान या अमर गीताला नवी ओळख देत ‘घर कब आओगे’ अशा रूपात नवीन आवृत्ती प्रदर्शित केली आहे. या नव्या गाण्याने प्रेक्षकांच्या मनात पुन्हा एकदा जुन्या आठवणी जागृत केल्या आहेत.
या नवीन आवृत्तीला पंजाबी गायक आणि अभिनेता दिलजीत दोसांझचा आवाज लाभला आहे. प्रेक्षकांनी गाण्याचे भरभरून कौतुक केले असले तरी दिलजीतने या प्रोजेक्टशी संबंधित अनेक भावनिक अनुभव अलीकडेच एका लाइव्ह सेशनमध्ये शेअर केले. विशेष म्हणजे, त्यांनी सुरुवातीला या गाण्याच्या रिमेकला स्पष्ट नकार दिला होता.
रिमेक ऐकून दिलजीतचा ठाम नकार (Diljit Dosanjh)
दिलजीतच्या मते, ‘संदेसे आते हैं’ हा इतका पवित्र आणि भावनिक गाण्यांचा अजरामर नमुना आहे की त्याला नव्याने सादर करणे म्हणजे त्या भावनांशी छेडछाड करण्यासारखे आहे. त्यामुळे सुरुवातीला जेव्हा त्यांना कळले की या गाण्याची नवीन आवृत्ती तयार होत आहे, तेव्हा त्यांनी स्पष्ट शब्दांत सांगितले की ते या प्रोजेक्टचा भाग होणार नाहीत. त्यांच्या मते अशा क्लासिक गाण्याला स्पर्श करणे म्हणजे त्याच्या आत्म्याशी तडजोड होणे.
त्यांनी सांगितले की लोकांच्या मनात या गाण्याबद्दल असलेल्या आदरामुळे ते आधी संकोचले. त्यांना वाटत होते की इतक्या उत्कृष्ट आणि भावपूर्ण गाण्याचे रीक्रिएशन होऊ नये.Diljit Dosanjh
मिथुनचे नाव ऐकताच बदलला निर्णय
दिलजीतचा निर्णय बदलण्यामागे एकच कारण होते – संगीतकार मिथुन. जेव्हा त्यांना सांगण्यात आले की गाण्याची नवी आवृत्ती मिथुन कंपोज करत आहेत, तेव्हा दिलजीतचा दृष्टिकोन पूर्णपणे बदलला. मिथुन हे त्यांच्या संवेदनशील संगीत शैलीसाठी ओळखले जातात. त्यांनी यापूर्वी तयार केलेले अनेक सॉफ्ट, भावपूर्ण आणि अर्थपूर्ण गाणे प्रेक्षकांच्या मनात खोलवर घर करून राहिलेले आहेत. याच विश्वासामुळे दिलजीत या प्रोजेक्टमध्ये सहभागी होण्यासाठी तयार झाले. दिलजीतच्या म्हणण्यानुसार, मिथुनमुळेच त्यांनी या गाण्याला नवीन आवाज देण्याचा निर्णय घेतला.
लाइव्ह सेशनमध्ये दिलजीतने सांगितलेला आणखी एक महत्त्वाचा किस्सा म्हणजे त्यांची तब्येत बरी नसतानाही त्यांनी गाण्याचे रेकॉर्डिंग एका दिवसात पूर्ण केले. गाणे तयार झाल्यानंतर त्यांना स्टुडिओत बोलावण्यात आले, पण त्या काळात ते आजारी होते. तरीही त्यांनी कोणतीही कुरकुर न करता एकाच दिवशी संपूर्ण डबिंग आणि गाण्याचे रेकॉर्डिंग पूर्ण केले. त्यांनी सांगितले की, जरी तब्येत ठीक नसली तरी हे गाणे इतके भावनिक आणि सुंदर होते की त्यांना ते गाणे टाळणे शक्यच नव्हते.
दिलजीतने हेही कबूल केले की ते नियमितपणे हिंदी गाणी गात नाहीत. त्यांच्या संगीताचा मोठा भाग पंजाबीमध्ये असतो. मात्र ‘घर कब आओगे’च्या भावनिक अंगाने ते इतके प्रभावित झाले की त्यांनी भाषेचा विचारही न करता हे गाणे मनापासून गायले. त्यांच्या मते, गाण्याची सुंदरता इतकी प्रभावी होती की ते याला नकार देऊ शकले नाहीत.
