आजकाल बहुतांश स्मार्टफोन आणि इतर गॅजेट्समध्ये Type-C पोर्ट दिला जातो. बहुतेक लोक याचा वापर फक्त चार्जिंगसाठीच करतात. गरज पडली की चार्जिंग केबल लावतात आणि बॅटरी फुल झाली की केबल काढून घेतात.

पण तुम्हाला माहिती आहे का, हा पोर्ट चार्जिंगशिवायही अनेक कामांसाठी वापरता येतो? Type-C पोर्टच्या मदतीने तुम्ही अशी अनेक कामे करू शकता, ज्याबद्दल कदाचित तुम्ही कधी विचारही केला नसेल. आज आम्ही तुम्हाला Type-C पोर्टचे असेच काही महत्त्वाचे फायदे सांगणार आहोत.

अनेक नवीन स्मार्टफोनमध्ये रिव्हर्स चार्जिंगचा सपोर्ट दिला जातो. याचा अर्थ असा की Type-C पोर्टद्वारे तुमचा फोन फक्त चार्जच होत नाही, तर इयरबड्स, फिटनेस बँडसारखी इतर उपकरणेही चार्ज करू शकतो. यासाठी Type-C ते Type-C केबलची गरज भासते आणि त्यामुळे तुमचा फोनच जणू पॉवरबँकसारखा काम करू लागतो.

क्षणात होईल डेटा ट्रान्सफर

क्विकशेअर किंवा एअरड्रॉपद्वारे डेटा शेअर करणे सोपे असते, पण मोठ्या फाइल्स पाठवताना या पद्धतीला बराच वेळ लागतो. अशा वेळी Type-C पोर्ट तुमच्या खूप उपयोगी पडतो. दोन फोन Type-C ते Type-C केबलने कनेक्ट करून तुम्ही काही क्षणांत डेटा ट्रान्सफर करू शकता.

फोनला बनवेल छोटा कॉम्प्युटर

Type-C पोर्टच्या मदतीने तुम्ही तुमचा फोन छोट्या कॉम्प्युटरसारखा वापरू शकता. या पोर्टमध्ये ब्लूटूथ डोंगल प्लग करून वायरलेस कीबोर्ड आणि माऊसच्या साहाय्याने फोन ऑपरेट करता येतो. जर फोनची टचस्क्रीन खराब झाली असेल, तर ही पद्धत आणखी प्रभावी ठरते.