बीड जिल्ह्यातील शिरूर कासार पोलीस ठाण्याच्या हद्दीतून एक धक्कादायक अशी घटना समोर आली आहे. अल्पवयीन आणि चिमुकल्या मुलींवर वाढते अत्याचार ही अत्यंत गंभीर आणि चिंताजनक बाब ठरत आहे. समाजात सुरक्षिततेचा अभाव वाढत असल्याचे अशा घटनांतून स्पष्ट होते. कायदे कडक असतानाही गुन्हे थांबत नसणे हे समाजव्यवस्थेचे अपयश दर्शवते. पालक, शाळा, प्रशासन आणि समाज यांनी एकत्रितपणे मुलींच्या सुरक्षिततेसाठी ठोस उपाययोजना करणे आवश्यक आहे. बालसंरक्षणाबाबत जनजागृती वाढवणे, तक्रार नोंदवण्याची सोपी यंत्रणा, तसेच दोषींना जलद व कठोर शिक्षा देणे गरजेचे आहे. अशा या संपूर्ण परिस्थितीत आणखी एका धक्कादायक घटनेचा उलगडा झाला आहे.

5 वर्षांच्या चिमुकलीवर अमानुष अत्याचार

येथील एका साडेपाच वर्षांच्या चिमुकलीवर तिच्या नात्यातीलच एका व्यक्तीने लैंगिक अत्याचार केल्याची धक्कादायक घटना घडली आहे. या घटनेमुळे संतापाची लाट आहे. दरम्यान, या नराधमावर गुन्हा दाखल होऊ नये यासाठी गावातील लोकांनी पीडित मुलीच्या आईवर प्रचंड दबाव आणल्याचा आरोप आहे. बदनामीच्या भीतीने ग्रामस्थांनी चक्क बैठका घेऊन गुन्हा दडपण्याचा प्रयत्न केला, ज्यामुळे पीडित मुलीला तब्बल चार दिवस उपचारासाठी रुग्णालयात जाऊ दिलं नाही, असा संतापजनक प्रकार प्राथमिक तपासात उघड झाला आहे.

11 नोव्हेंबर रोजी ही अत्याचाराची अमानुष घटना घडली. या घटनेनंतर मुलीला असह्य वेदना होत असतानाही ग्रामस्थांनी ‘गावाची बदनामी नको’ या कारणास्तव पीडित कुटुंबाला उपचारासाठी बीड येथे जाण्यास मज्जाव केला. चार दिवस त्रास सहन केल्यानंतर अखेर मुलीच्या नात्यातील काही व्यक्तींना ही घटना समजली. त्यांनी थेट पोलीस अधीक्षक नवनीत कॉवत यांच्याशी संपर्क साधला. त्यानंतर प्रकरणाचे गांभीर्य लक्षात घेत शिरूर कासार पोलिसांनी तात्काळ गुन्हा नोंदवून घेतला.

पीडित चिमुरडीवर ICU मध्ये उपचार सुरू

सध्या पीडित चिमुरडीवर बीड येथील शासकीय रुग्णालयाच्या अतिदक्षता विभागात उपचार सुरू आहेत. आपल्या मुलीवर झालेल्या अत्याचाराची आणि त्यानंतर गावकऱ्यांनी केलेल्या छळाची आपबीती सांगत असताना पीडित मुलीच्या आईला अश्रू अनावर झाले होते. या संपूर्ण प्रकरणातील ग्रामस्थांच्या भूमिकेवर तीव्र संताप व्यक्त होत आहे. गावातील लोकांनी बदनामीच्या भीतीने पीडित कुटुंबालाच धमकी दिल्याचं समोर आलं आहे.

मुलींच्या सुरक्षिततेसाठी उपाययोजनांची गरज

लहान व अल्पवयीन मुलींच्या सुरक्षिततेसाठी ठोस आणि व्यापक उपाययोजना राबवणे अत्यावश्यक आहे. घर, शाळा आणि सार्वजनिक ठिकाणी मुली सुरक्षित राहतील यासाठी पालकांनी सतर्कता बाळगणे गरजेचे आहे. शाळांमध्ये स्वसंरक्षण, चांगला-वाईट स्पर्श याबाबतचे शिक्षण देणे महत्त्वाचे आहे. पोलिस गस्त वाढवणे, सीसीटीव्ही कॅमेरे बसवणे आणि बालसुरक्षा हेल्पलाईन अधिक प्रभावी करणे आवश्यक आहे. तसेच लैंगिक अत्याचार करणाऱ्यांना जलद आणि कठोर शिक्षा देऊन कायद्याची भीती निर्माण केली पाहिजे. समाजातील प्रत्येक घटकाने जबाबदारी घेतल्यासच मुलींची सुरक्षितता सुनिश्चित होऊ शकते.