पुण्यात घर घेण्याचे स्वप्न साकारण्याची मोठी संधी; म्हाडाकडून 4,186 घरांसाठी लॉटरी, तात्काळ अर्ज भरा!

या सोडतीत विविध योजनांमधून घरे उपलब्ध करून देण्यात आली आहेत. पंतप्रधान आवास योजना अंतर्गत 219 घरे, म्हाडा गृहनिर्माण योजनेत 1,683 घरे, 15% सामाजिक गृहनिर्माण योजनेअंतर्गत 864 घरे तर 20% सर्वसमावेशक गृहनिर्माण योजनेत 3,322 घरे देण्यात येणार आहेत. यामुळे सर्वसामान्यांपासून मध्यमवर्गीय कुटुंबांपर्यंत सर्वांना आपल्या बजेटनुसार घर घेण्याची संधी मिळणार आहे.

अर्ज प्रक्रिया आणि अखेरची सोडत

अर्ज प्रक्रिया पूर्णपणे ऑनलाईन पद्धतीने होणार आहे. 11 सप्टेंबर 2025 रोजी दुपारी 12:30 पासून अर्ज व अनामत रक्कम भरण्यास सुरुवात झाली असून, अर्ज सादर करण्याची अंतिम तारीख 31 ऑक्टोबर 2025 अशी आहे. बँक RTGS/NEFT द्वारे रक्कम भरण्याची शेवटची संधी 1 नोव्हेंबरपर्यंत आहे. त्यानंतर 11 नोव्हेंबरला प्राथमिक यादी जाहीर होईल, 13 नोव्हेंबरपर्यंत दावे-हरकती दाखल करता येतील, तर 17 नोव्हेंबरला अंतिम यादी प्रसिद्ध केली जाईल. अखेरची सोडत 21 नोव्हेंबर रोजी दुपारी 12 वाजता पार पडणार असून निकाल त्याच दिवशी संध्याकाळी वेबसाईटवर जाहीर केला जाईल.

पारदर्शकता राखण्यासाठी संपूर्ण प्रक्रिया ऑनलाईन करण्यात आली आहे. अर्ज नोंदणीपासून रक्कम भरणे आणि निकाल तपासणे, हे सर्व टप्पे अर्जदारांनी अधिकृत संकेतस्थळावरूनच पूर्ण करावेत, असे आवाहन करण्यात आले आहे. इच्छुकांनी वेळेवर अर्ज करणे आणि आवश्यक कागदपत्रे पूर्ण ठेवणे महत्त्वाचे आहे. त्यामुळे इच्छुकांनी खरंतर तात्काळ या संधीचा फायदा घ्यावा, असे आवाहन करण्यात येत आहे.