सोलापूर विमानतळाचे महत्व अत्यंत रणनीतिक आणि आर्थिक दृष्ट्या मोठे आहे. हे विमानतळ सोलापूर शहर आणि परिसराला महाराष्ट्रातील प्रमुख शहरांशी जोडते. औद्योगिक, व्यापारी आणि धार्मिक केंद्र म्हणून सोलापूरचे महत्त्व वाढत असताना, विमानतळामुळे प्रवास सुलभ आणि जलद झाला आहे. या विमानतळाच्या माध्यमातून व्यवसायिकांना, उद्योगपतींना आणि पर्यटकांना सोयीस्कर वाहतूक उपलब्ध होते. तसेच, सोलापूर-मुंबईसारख्या उड्डाणांमुळे स्थानिक अर्थव्यवस्थेला चालना मिळणार आहे. त्यामुळे आज मुंबई-सोलापूर…सोलापूर-मुंबई अशी विमानसेवा सुरू होत आहे.

आजपासून सोलापूर-मुंबई विमानसेवा

सोलापूरकरांसाठी आज मोठी दिवस आहे. दीर्घकाळच्या प्रतीक्षेनंतर आज सोलापूर-मुंबई विमान सेवेला सुरुवात होणार आहे. सोलापूर-मुंबई या बहुप्रतिक्षित विमानसेवेचा शुभारंभ आज मुख्यमंत्री देवेंद्र फडणवीस यांच्या हस्ते होणार आहे. ही सेवा सुरू झाल्यामुळे सोलापूर आणि मुंबई या दोन महत्त्वाच्या शहरांमधील प्रवास अवघ्या 50 मिनिटांत पूर्ण करता येणार आहे. या विमानसेवेमुळे प्रवासाचा वेळ आणि खर्च दोन्ही कमी होणार आहे. याचा व्यापारी आणि औद्योगिक क्षेत्रासह सामान्य नागरिकांनाही मोठा फायदा होणार आहे.

मुख्यमंत्री फडणवीस हे या विमानाचे पहिले प्रवासी असणार आहेत. फडणवीस हे मुंबई ते सोलापूर विमानातून सोलापूरमध्ये दाखल होणार आहेत. सोलापूर विमानतळावर छोटेखानी समारंभात या सेवेचे उद्घाटन करण्यात येणार आहे. काही दिवसांपूर्वीच सोलापूर-गोवा विमानसेवा सुरू झाली होती. त्यानंतर सोलापूर-मुंबई विमानसेवेची मागणी वाढली होती. ही मागणी आता पूर्ण होत असून सोलापूर आणि आसपासच्या जिल्ह्यांना या विमानसेवांचा फायदा होणार आहे. तसेच यामुळे या परिसरात हवाई संपर्क अधिक मजबूत होणार आहे.