मराठा समाजाचे नेते मनोज जरांगे पाटील हे मुंबईत दाखल झाले आहेत. सरकारचे शिष्टमंडळ जरांगे पाटलांची समजूत काढण्यात अपयशी ठरले. जरांगे पाटील हे ओबीसीमधून आरक्षण मिळवण्यासाठी आझाद मैदानावर उपोषणाला बसणार आहेत. मागील काही दिवसांपासून ते ओबीसीमधून आरक्षण मिळवण्यासाठी उपोषण करताना दिसत आहेत. आता त्यांनी थेट मुंबई गाठली आहे. आझाद मैदानात जरांगेंनी उपोषण सुरू केले आहे.
मनोज जरांगेंचे मुंबईत बेमुदत उपोषण
मराठा आरक्षण आंदोलक मनोज जरांगे पाटील यांनी चार महिन्यांपूर्वी केलेल्या घोषणेप्रमाणे ते आज 29 ऑगस्ट रोजी राज्याची राजधानी असलेल्या मुंबईत दाखल झाले असून त्यांनी मराठ्यांना ओबीसीतून आरक्षण मिळावं, यासाठी आमरण उपोषणास सुरुवात केली आहे. मनोज जरांगे पाटील यांच्या उपोषण आंदोलनाला राज्यभरातून मोठा प्रतिसाद मिळत असून लाखो समाजबांधव जरांगे पाटील यांच्या पाठिंब्यासाठी मुंबईत पोहोचले आहेत. एकीकडे मराठा समाजातील सर्वसामान्य तरुण जरांगे पाटील यांच्या पाठीशी उभे राहिले असताना अनेक राजकीय नेत्यांनीही या आंदोलनाला जाहीर पाठिंबा दिला आहे.
अनेक आमदार-खासदार जरांगेंच्या भेटीला
मनोज जरांगे पाटील यांनी आझाद मैदानात आमरण उपोषण सुरू केल्यानंतर मराठवाड्यातील अनेक आमदार-खासदारांनी जरांगे पाटील यांची भेट घेतली. बीडचे खासदार बजरंग सोनवणे यांनी लोकसभेत मराठा आरक्षणासाठी आवाज उठवला होता. खासदार सोनवणे हे आज आझाद मैदानात हजर असल्याचे पाहायला मिळाले. परभणीचे खासदार संजय ऊर्फ बंडू जाधव यांच्या मतदारसंघातही आरक्षणाच्या मागणीचा मोठा जोर आहे. त्यामुळे संजय जाधव हेदेखील या लढ्यात सहभागी झाले आहेत.
धाराशिवचे खासदार ओम राजेनिंबाळकर आणि धाराशिव-कळंबचे आमदार कैलास पाटील यांनीही मनोज जरांगे पाटील यांची आझाद मैदानावरील उपोषणस्थळी भेट घेतली आणि या लढ्यात आपण सोबत असल्याचं सांगितलं आहे. दुसरीकडे, बीड जिल्ह्यातील तीन आमदार आज जरांगे पाटील यांच्या स्टेजवर पाहायला मिळाले. बीड विधानसभा मतदारसंघाचे आमदार संदीप क्षीरसागर यांनी आझाद मैदानावर उपस्थित राहून जरांगे पाटील यांना आपला पाठिंबा दर्शवला.
बीडमधील माजलगावचे आमदार प्रकाश सोळंके यांनीही मनोज जरांगे पाटील यांच्याशी चर्चा करत आपला तुमच्या मागणीला संपूर्ण पाठिंबा असल्याचं सांगितलं.उपमुख्यमंत्री अजित पवार यांच्या राष्ट्रवादीचे गेवराईचे आमदार विजयसिंह पंडित हेदेखील मनोज जरांगे यांच्या पाठिंब्यासाठी आझाद मैदानावर पोहोचले होते. राष्ट्रवादी शरदचंद्र पवार पक्षाचे माढ्यातील आमदार अभिजीत पाटील यांनीही आझाद मैदानावर जाऊन जरांगे पाटील यांच्या लढ्याला पाठिंबा दिला.
