पाकिस्तान १९ वर्षांखालील आशिया कपचा नवा विजेता बनला आहे. २०२५ च्या १९ वर्षांखालील आशिया कपच्या अंतिम सामन्यात पाकिस्तानने भारताचा १९१ धावांनी पराभव केला. जेतेपदाच्या सामन्यात प्रथम फलंदाजी करताना पाकिस्तानने समीर मिन्हासच्या धमाकेदार शतकाच्या जोरावर ३४७ धावा केल्या. प्रत्युत्तरादाखल टीम इंडिया फक्त १५६ धावांवर ऑलआउट झाली. वैभव सूर्यवंशी आणि आयुष म्हात्रे यांच्यासह ऑलस्टार खेळाडू अपयशी ठरले.
अंतिम सामन्यात भारताकडून वैभव सूर्यवंशी १० चेंडूत २६ धावा काढून बाद झाला. कर्णधार आयुष म्हात्रेला फक्त दोन धावा करता आल्या. सहा भारतीय खेळाडू दुहेरी आकडा गाठू शकले नाहीत. दहाव्या क्रमांकावर फलंदाजी करणाऱ्या दीपेश देवेंद्रनने १६ चेंडूत ३६ धावा करत सर्वाधिक धावा केल्या. पाकिस्तानकडून अली रझा याने ४२ धावांत चार बळी घेतले, तर मोहम्मद सयाम, अब्दुल सुभान आणि हुजैफा एहसान यांनी प्रत्येकी दोन बळी घेतले.
भारताची सुरुवात निराशाजनक, सर्व स्टार खेळाडू अपयशी ठरले
पाकिस्तानने दिलेल्या ३४८ धावांच्या विशाल लक्ष्याचा पाठलाग करताना भारताची सुरुवात निराशाजनक झाली. तिसऱ्या षटकात भारताने ३२ धावांवर पहिली विकेट गमावली. आयुष म्हात्रे सात चेंडूत दोन धावा काढून बाद झाला. त्यानंतर नऊ चेंडूत १६ धावा काढून आरोन जॉर्ज बाद झाला. त्यानंतर वैभव सूर्यवंशी १० चेंडूत २६ धावा काढून बाद झाला, ज्यामध्ये एक चौकार आणि तीन षटकारांचा समावेश होता.
भारताच्या एकाही आघाडीच्या फलंदाजाने सातत्यपूर्ण फलंदाजी केली नाही. जलद धावांचा पाठलाग करताना सर्व फलंदाज बाद झाले. वेदांत त्रिवेदी १४ चेंडूत ९, अभिज्ञान कुंडू २० चेंडूत १३, कनिष्क चौहान २३ चेंडूत ९ आणि खिलन पटेल २३ चेंडूत १९ धावा करून बाद झाले. हेनिल पटेल ६ आणि दीपेश देवेंद्रन ३६ धावा करून बाद झाले.
समीर मिनहासने १७२ धावा फटकावल्या
यापूर्वी, पाकिस्तानचा सलामीवीर समीर मिनहासने ११३ चेंडूत १७ चौकार आणि ९ षटकारांसह १७२ धावांची धमाकेदार खेळी केली. अंतिम सामन्यात समीरने केवळ ७१ चेंडूत आपले शतक पूर्ण केले. समीरच्या स्फोटक फलंदाजीमुळे पाकिस्तानने जेतेपदाच्या सामन्यात ५० षटकांत ७ बाद ३४७ धावा केल्या.
