Indian Railway : भारतीय रेल्वेने तत्काळ तिकीट बुकिंग प्रक्रियेत मोठी सुधारणा जाहीर केली असून, यामुळे अनेक वर्षांपासून वेगवान बुकिंगमुळे हुलकावणी मिळणाऱ्या प्रवाशांना आता मोठा दिलासा मिळणार आहे. तिकीट विंडो उघडताच काही सेकंदांत सर्व तिकीट संपण्याच्या तक्रारींच्या पार्श्वभूमीवर रेल्वेने नवीन नियम आणि तांत्रिक बदल लागू केले आहेत.

आधार-लिंक अनिवार्य; अपूर्ण खाते ‘ब्लॉक’ होणार

नवीन नियमानुसार, आता तत्काळ तिकीट फक्त **व्हेरिफाइड IRCTC खात्यांतूनच** बुक करता येणार आहे. यासाठी प्रवाशाचे IRCTC खाते आधार क्रमांकाशी लिंक असणे आवश्यक आहे.
अपूर्ण माहिती असलेले किंवा आधार लिंक नसलेले खाते तत्काळ बुकिंगच्या वेळी थेट ‘ब्लॉक लिस्ट’ मध्ये जाणार आहे. यामुळे खोट्या नावाने तिकीट घेणे किंवा दलालांकडून तिकीटांचा गैरवापर होण्याची शक्यता मोठ्या प्रमाणात कमी होणार आहे. Indian Railway

तांत्रिक सुरक्षेत मोठी उडी (Indian Railway)

बुकिंगदरम्यान काही सेकंदांत तिकीट गायब करणाऱ्या ऑटो-फिल सॉफ्टवेअर्स, स्क्रिप्ट्स आणि बॉट्सवर आता रेल्वेने पूर्ण ब्रेक लावला आहे. अत्याधुनिक फिल्टर सिस्टीममुळे अशा कोणत्याही अनधिकृत साधनांचा वापर यापुढे शक्य होणार नाही. याशिवाय, पेमेंट फेल होण्याच्या तक्रारी टाळण्यासाठी रेल्वेने पेमेंट गेटवे अधिक वेगवान आणि सुरक्षित केले आहेत. त्यामुळे पैसे वळते पण तिकीट मिळत नाही अशी समस्या आता मोठ्या प्रमाणात घटणार आहे.

एजंटवर कडक नजर

तत्काळ विंडो सुरू होताच काही एजंट मोठ्या प्रमाणात तिकीट खरेदी करतात, अशी अनेक वर्षांची तक्रार होती. हे रोखण्यासाठी रेल्वेने विशेष ट्रॅकिंग सिस्टीम लागू केली आहे. यामुळे संशयास्पद बुकिंगवर तात्काळ कारवाई करता येणार असून, सामान्य प्रवाशांना आणखी प्राधान्य मिळणार आहे.

प्रवाशांसाठी रेल्वेचा सल्ला

ज्यांचे IRCTC खाते आधीपासूनच अपडेट आहे आणि आधारशी लिंक आहे, अशा प्रवाशांना आता कन्फर्म तिकीट मिळण्याची शक्यता मोठ्या प्रमाणात वाढली आहे. रेल्वेने प्रवाशांना बुकिंगपूर्वी इंटरनेट कनेक्शन, प्रोफाइल माहिती आणि लॉग-इन तपशील आधीच तपासून ठेवण्याचा सल्ला दिला आहे.