वरिष्ठ आयपीएस अधिकारी आणि माजी एनआयए प्रमुख सदानंद दाते यांची महाराष्ट्राचे पोलीस महासंचालक म्हणून नियुक्ती केली आहे.  महाराष्ट्र सरकारने याबाबतचा औपचारिक आदेश जारी केला आहे. सदानंद दाते हे महाराष्ट्राच्या डीजीपी रश्मी शुक्ला यांची जागा घेणार आहेत. रश्मी शुक्ला यांचा कार्यकाळ 31 डिसेंबर रोजी संपत आहे. 3 जानेवारीला सदानंद दाते पदभार स्वीकारणार आहेत.

सदानंद दाते महाराष्ट्राचे नवे पोलीस महासंचालक

महाराष्ट्राचे विद्यमान पोलीस महासंचालक 1988च्या तुकडीतील वरिष्ठ आयपीएस अधिकारी रश्मी शुक्ला पुढील महिन्यात 3 जानेवारी रोजी निवृत्त झाल्यानंतर सदानंद दाते पदभार स्वीकारणार आहेत. महाराष्ट्र केडरमधील सर्वात वरिष्ठ आयपीएस अधिकारी म्हणून सदानंद दातेंचे नाव समोर आले होते. तेव्हापासून महाराष्ट्र पोलिसांचे डीजीपी होण्याच्या शर्यतीत ते आघाडीवर होते. 26/11 च्या मुंबई दहशतवादी हल्ल्याचा नायक आयपीएस सदानंद दाते प्रामाणिकपणा आणि कामाप्रती समर्पित वृत्तीसाठी ओळखले जातात. त्यांनी 31 मार्च 2024 रोजी एनआयएचे तत्कालीन महासंचालक दिनकर गुप्ता यांच्याकडून एनआयएचा कार्यभार स्वीकारला होता.

सदानंद दाते- कर्तव्यदक्ष, कार्यतत्पर IPS अधिकारी

1990 च्या बॅचचे आयपीएस अधिकारी सदानंद दाते यांना त्यांच्या मूळ कॅडरमध्ये परतण्यास केंद्र सरकारने अलीकडेच मान्यता दिली आहे. सदानंद दाते यांनी यापूर्वी राज्य दहशतवाद विरोधी पथकाचे (एटीएस) नेतृत्व केले आहे आणि मुंबईत सह पोलिस आयुक्त (गुन्हे) आणि सह पोलिस आयुक्त (कायदा आणि सुव्यवस्था) म्हणून काम केले आहे. एनआयए प्रमुख होण्यापूर्वी, सदानंद दाते यांनी महाराष्ट्रात दहशतवाद विरोधी पथकाचे (एटीएस) प्रमुख म्हणून काम पाहिले. त्यांनी महाराष्ट्रात अनेक महत्त्वाची पदे भूषवली आहेत, ज्यात मीरा-भाईंदर आणि वसई-विरारचे पोलिस आयुक्त, सहआयुक्त (कायदा आणि सुव्यवस्था) आणि मुंबईतील गुन्हे शाखेचे सहआयुक्त यांचा समावेश आहे. त्यांनी सीबीआयमध्ये उपमहानिरीक्षक आणि केंद्रीय राखीव पोलिस दलात (सीआरपीएफ) महानिरीक्षक म्हणूनही काम केले आहे.

2008  मध्ये झालेल्या 26/11 च्या दहशतवादी हल्ल्यात सदानंद दाते प्रसिद्धीच्या झोतात आले. 26/11 च्या दहशतवादी हल्ल्यात ते कामा रुग्णालयात अजमल कसाबसोबत लढले आणि थोडक्यात बचावले. दहशतवादाविरुद्धच्या त्यांच्या शौर्यामुळे ते नायक बनले. यासाठी त्यांना 2008 मध्ये राष्ट्रपती पोलिस पदक देण्यात आले. सर्वोच्च न्यायालयाच्या निर्देशानुसार, डीजीपीचा कार्यकाळ किमान दोन वर्षांचा असणे आवश्यक आहे. रश्मी शुक्ला यांची निवृत्तीच्या फक्त पाच महिने आधी जानेवारी 2024 मध्ये डीजीपी म्हणून नियुक्ती करण्यात आली होती आणि त्यांना 3 जानेवारी 2026 पर्यंत मुदतवाढ देण्यात आली होती. या नियुक्तीनंतर, सदानंद दाते यांचा कार्यकाळ आता 2027 च्या अखेरपर्यंत राहील.