Akshay Kumar : धुरंधरने बॉक्स ऑफिसवर उभा केलेला तुफानी गाजावाजा कायम राहिल्याने अनेक मोठे स्टार्स आणि निर्माते आगामी चित्रपटांच्या रिलीज डेटबाबत अधिक सतर्क झाले आहेत. रणवीर सिंहच्या या चित्रपटाने 27 दिवसांत भारतात 700 कोटींचा टप्पा पार केला असून जागतिक स्तरावर त्याची कमाई 1000 कोटींवर पोहोचली आहे. सर्वात महत्त्वाचे म्हणजे, चौथ्या आठवड्यातही या चित्रपटाच्या कमाईचा वेग कमी झालेला नाही. यामुळे 2026 च्या ईदसाठी निश्चित करण्यात आलेल्या ‘धुरंधर 2’च्या रिलीजला आधीच जबरदस्त मागणी मिळत आहे.

हीच ती विंडो होती ज्यावर इतर मोठ्या चित्रपटांची नजर होती. सुरुवातीला अजय देवगनची ‘धमाल 4’ही याच दिवशी येणार होती, परंतु धुरंधरच्या प्रचंड लाटेपासून स्वतःला दूर ठेवण्यासाठी त्यांनी ती रिलीज डेट पुढे ढकलली. आता त्याच मार्गावर अक्षय कुमारही चालत असल्याची चर्चा सुरू झाली आहे.

अक्षयला कस गेल 2025 (Akshay Kumar)

अक्षय कुमारसाठी 2025 हे वर्ष तुलनेने स्थिर होतं. स्कायफोर्स, केसरी चैप्टर 2, हाउसफुल 5 आणि जॉली एलएलबी 3 या चारही चित्रपटांनी बॉक्स ऑफिसवर अपेक्षित किंवा ठीकठाक कामगिरी केली होती. सध्या त्यांच्या हाती विविध शैलींच्या अनेक मोठ्या फिल्म्स आहेत. 2026 मध्ये ते प्रियदर्शनसोबत दोन प्रकल्पांद्वारे परत येणार आहेत, शिवाय वेलकम टू द जंगलही पुढील वर्षासाठी सज्ज केली जात आहे.

पण याच दरम्यान त्यांची महत्त्वाची फिल्म ‘भूत बंगला’ पुन्हा एकदा चर्चेत आली आहे. प्रियदर्शन यांच्या दिग्दर्शनाखाली आणि बालाजी मोशन पिक्चर्सच्या निर्मितीत तयार होणाऱ्या या चित्रपटाबाबत सुरुवातीला सांगण्यात आले होते की तो 2025 मध्ये रिलीज होईल. मात्र नंतर डिसेंबर 2024 मध्ये नवा पोस्टर जाहीर झाला आणि त्यात 2 एप्रिल 2026 ही नवी रिलीज डेट दिली गेली. Akshay Kumar

ताज्या अहवालांनुसार, अक्षय कुमार या तारखेवरही समाधानी नाहीत. कारण धुरंधर 2, 19 मार्च 2026 रोजी प्रदर्शित होणार आहे आणि त्यानंतर अवघ्या दोन आठवड्यांत भूत बंगला आणणे म्हणजे थेट धुरंधरच्या वादळाशी स्पर्धा करणे ठरेल. उद्योगातील सूत्रांनुसार, अक्षय आणि प्रियदर्शन दोघेही ही स्पर्धा टाळू इच्छित आहेत. धुरंधरच्या प्रचंड यशामुळे जवळपास कोणताही मोठा स्टार त्याच्या पाठोपाठ फिल्म रिलीज करण्यास धजावत नाही.

अक्षयसमोर अडचणीत अडचणी

अक्षयसमोर आणखी एक अडचण आहे. इमरान हाशमीने आधीच आवारापन 2 ची रिलीज डेट 3 एप्रिल 2026 अशी जाहीर केली आहे. म्हणजे अक्षयची भूत बंगला जर 2 एप्रिल 2026 ला आली, तर एका दिवसा-दोन दिवसांच्या आतच प्रेक्षकांचे लक्ष दोन मोठ्या फिल्म्समध्ये विभागले जाईल आणि यामुळे नुकसान होण्याची शक्यता आहे. त्यामुळे भूत बंगला आणखी पुढे ढकलली जाईल का, अशी शक्यता अधिक व्यक्त केली जात आहे.

सध्या या निर्णयाबाबत निर्मात्यांकडून कोणतीही अधिकृत घोषणा आलेली नाही. मात्र चर्चेनुसार, अक्षय कुमार आगामी तगड्या स्पर्धेपासून स्वतःला दूर ठेवून आपला चित्रपट सुरक्षित स्लॉटमध्ये आणण्याचा विचार करत आहेत. धुरंधरची लाट पाहता अनेक निर्माते आधीच पाऊल मागे घेत आहेत, त्यामुळे 2026 मधील मोठे चित्र आणखी काही दिवसांत स्पष्ट होईल अशी अपेक्षा आहे.